今日係黃子華《金盆o浪口》26場棟篤笑尾場演出，真真正正係黃子華最後一場棟篤笑喇，喺謝幕嘅時候，子華就忍唔住抹一抹眼淚，始終最後一場，都一定有啲感觸，之後全場觀眾大叫：「多謝你！」有啲嘉賓包括古巨基、古太等等都企起身拍手。
之後子華將佢飲水嗰隻杯拋落台俾觀眾，仲話：「一隻杯，萬幾人分咩，真係最後時間喇！」之後子華就講出佢13個會做棟篤笑嘅原因，然後就唱出佢首《幻海奇情》，唱完之後唔少觀眾企起身拍手。
子華：「睇下當年呢個咁樣嘅傻佬，喺做呢樣嘢嘅時候嘅原因係咩呢？以下係我做棟篤笑嘅原因，排名不分先後時間或重要性，總共有十三點。」
第一：一個朋友患了腎病
第二：時常失眠。子華：「都唔係一個好開心嘅人啊下呢條友。」
第三：做咗一個唔係喜劇嘅個人表演，卻引來不少笑聲。子華：「嗰個個人表現我其中一部份係做《哈姆雷特》嘅添啊，即係『To be, or not to be: that is the question: Whether 'tis nobler in the mind to suffer The slings and arrows of outrageous fortune, Or to take arms against a sea of troubles And by...』然後有人覺得好好笑啊，邵國華直情話『你應該做stand up comedy，因為你夠賤，一個最賤嘅《哈姆雷特》』」
第四：下班後不想回家，回家後不想上班。
第五：搞笑騷流行起來。
第六：第一場多謝過嘅葉潔馨小姐話『你應該做stand up comedy』。
第七：讀咗一本邊緣棟篤笑嘅書。子華：「佢唔講人地淨係講自己，唔係幾好笑。」
第八：睇咗Eddie Murphy（愛迪梅菲）嘅棟篤笑。子華：「好好笑。」
第九：迷惘，書都唔想睇。
第十：儲蓄咗好耐嘅小量金錢，一下子又被借光。子華：「淨憑呢句說話你就知呢一條友係好戇居啦，你分明唔想借你咪鬼借囉。」
第十一：看見許冠文在Sam嘅演唱會中做棟篤笑。咁係咪我都得呢？我都唔記得。
第十二：太寂寞，養咗隻狗。
第十三：快三十。
子華：「我唔知邊啲朋友捱緊生活好難捱，話你聽，我個時睇嚟都唔係容易捱，我睇呢十幾點。好啦依家竟然做完添，係做完勒各位，真係《幻海奇情》，我唔知呢個故事係勵志定摧毀你，定係會乜嘢，大家可以返去諗下，但係我真係覺得係，係好豐富的虛幻過程，送最後一首歌畀大家。」
完場之後，子華就喺後台出嚟，有成三百個fans等緊子華，子華出嚟嘅時候，fans即時大叫，仲送上禮物，又有播出古巨基嘅《子華說》，fans仲話等子華反口，記者問到子華攰唔攰，佢就話：「ok啦。」之後一直揮手，直到上車都同fans揮手。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|