當黃金時間換上一部又一部國產劇，大家只好承認，香港電視的風光日子已遠去。曾幾何時，香港的電視節目走得很前，80年代亞視的成人資訊節目《活色生香》，多次踩入各大夜總會拍無上裝，主持人李道洪化身playboy提供夜場資訊，是不少六十後男士的集體回憶。
現年65歲的李道洪的確是活在電視界，以及是整個香港的光輝時代。日前李道洪跟《蘋果》細說當年威水史：「中國城、大富豪、大都會老細全部我識晒，我同佢哋講不如贊助我，有脫衣舞有乜嘢我嚟拍，總之我打格仔。」
撰文：戴彩煥
攝影：陳慧安
李道洪是70年代無綫劇御用的花花公子，《網中人》一劇中飾演的奸角阮其昌，報警令虧空公款的周潤發入獄，形象鮮明。不過，要數李道洪真經典，絕對是由他、洪羅拔和周美鳳主持、播足五年的成人節目《活色生香》。
收視四台之首
於上海定居多年的李道洪，日前受訪時表示：「監製話我形象咁playboy，有個節目好啱我，就係《活色生香》，教大家酒色財氣，早期係叫《男人世界》。」不過節目首三個月反應平平，後來延後播放時間，收視才飆升。「最初時段唔啱，係夜晚8點至9點，不如去盡啲，當成人節目嚟搞，10點半先播，播到12點，後來你見到我哋可以提避孕丸，又可以講性病、脫衣舞、婚前性行為，請醫生上嚟傾，變咗專題節目，做吓做吓搶到收視冠軍，我記得我哋收視係四台同一時段之冠。」
談及性健康之外，《活色生香》還走到各大夜總會拍攝男士們的花花世界，開創電視節目先河。李道洪說：「嗰啲係我擅長，嗰時我幫一隻白蘭地做宣傳，我同隻酒個總經理好熟，本來佢哋請我拍酒廣告，我成日落club拍外景同埋同佢哋做活動，我就諗，不如你哋做我sponsor，兼搵埋nightclub，所以啲中國城、大富豪、大都會老細全部我識晒，我同佢哋講不如贊助我，有脫衣舞有乜嘢我嚟拍，總之我打格仔。」節目越做越hit，hit到衝出香港到泰國、菲律賓，甚至埃及、巴西等地拍攝夜生活。
菲律賓遇槍戰
夜場品流複雜，李道洪最難忘在菲律賓的經歷：「我哋離開咗馬尼拉去咗另一個城市拍，品流比較複雜，有人吸大麻，好多色情節目可以睇到，有刑警朋友保護本來以為冇事，但有次啲刑警朋友叫我哋快啲走，聽到街出面有槍聲，佢哋話好似掃場，叫我同司機喺後門走先，佢哋去維持治安，第二日聽到原來係當地兩幫黑社會火併，打咗四十幾槍。」李道洪遊遍外地夜場，那麼他應該「食」勻全世界吧？他聞言哈哈大笑說：「我哋有旅行社、旅遊局贊助，唔可以影響image，仲有係每次我哋都帶女主持去，啲女主持全部亞姐嚟，我唔可以喺亞姐面前失咗哥哥身份。佢哋個個好尊敬我，叫我Mr. Lee！唔係話我乖，而係我好驚返到嚟畀人唱。仲有一樣嘢，嗰陣時愛滋病好流行，嚇死人㗎，千祈唔好走埋去呀。」
場地提供：Gulu Gulu
|
鍾意就快D Share啦！
|
|
|
