方紹聰（奶仔）同TVB只係普通藝員約，靠份幾千蚊底新當然唔夠生活，所以，唔使開劇時，佢會揸貨van送貨賺錢。奶仔嘅爸爸今年榮休，雖然佢冇乜積蓄，但為咗慶祝老豆榮休，佢幾乎用晒份身家，買咗隻勞力士送比老豆，好孝順！「其實買嘅時候，我都唔係好多錢，因為嗰時我爸爸六十歲大壽，佢又退休，我爸爸好犀利，佢後生嘅時候做兩份工作，一份喺果欄工作，另一份喺巴士公司入面做司機，其實一日瞓兩至三個鐘，好辛苦，然後我有個家姐，佢係輕度弱智人士，佢唔會出嚟工作，所以其實又唔可以講屋企靠我搵錢嘅，因為屋企唔算好有錢，但都唔憂嘅，其實屋企人都好支持我做其他嘢，所以諗完雖然覺得好肉痛，佔我積蓄入面好多嘅錢，但一諗到以前爸爸瞓幾個鐘都無同你計，而家六十歲榮休喎，我覺得買隻錶俾佢，其實我覺得佢最開心唔係個仔買到一隻好貴嘅錶俾佢，而係佢會知道個仔都有呢個心，同埋隻錶朋友見到都幾開心。」
聽奶仔講，佢家姐係弱智人士，媽咪主力照顧佢，而家，老豆退埋休，家庭負擔順理成章落喺佢身上。「所以而家都好希望喺TVB，或者其他演藝事業入面可以做得好啲，同埋收入唔係多，我就做多啲唔同嘅兼職，可以俾媽咪飲茶，帶家姐周圍玩。」31歲嘅奶仔性格樂觀，積極有禮貌，喺呢行，已經買少見少。「因為由細到大，爸爸媽媽唔係讀書好多嘅人，所以佢從來唔會對我嘅成績有意見，我又未試過考包尾咁大件事，總之佢同我講，阿仔你自己開心，你鍾意讀咩都得，唔好結識壞人就得喇，所以由細到大做好多嘢都係自己鍾意嘅，同埋唔好傷害到人嘅，咁我就會去做，所以我覺得呢個樂天主要都係屋企人培養。」奶仔嘅阿爸阿媽成日都會同佢講，如果有一日佢哋走咗，就要佢負責照顧家姐，奶仔從來唔覺家姐係個負擔，仲好錫佢添，所以，一有時間，一家四口會周圍去，好開心。「我諗大家都會，細個嘅時候唔懂得珍惜屋企人，但而家愈大個，你會開始⋯⋯因為細個唔識諗，而家大個知道，其實每一日就係每一日，就會希望可以珍惜同佢哋時間，同埋給個搵唔到錢，而家大個搵到錢，細個佢哋俾咗咁多時間精神，希望而家大個搵到錢，都可以回饋番佢哋。」
採訪：肥A
攝錄：黃志明
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|