蔡曉儀曾經喺泰國拒絕過一個有婦之夫追求後就中降頭，隨即性情大變患上抑鬱兼兩度尋死。聽落好似誇張但唔係講笑架，《壹》仔就曾經見過佢精神渙散、雙目無神咁呆企街頭十幾廿秒，一睇就知佢精神狀況唔樂觀。好彩，之後《壹》仔每次見到佢，精神都一日比一日好，歸根究底都係得到愛情嘅滋潤。
最近《壹》仔又見到蔡曉儀，雖然仲係口擘擘、面部表情僵硬、無咩神氣咁，但對比起以前嘅迷糊狀態，而家已經好好多架喇，或者係多得男友悉心照料啩。事關佢哋兩個出街拍拖，雖則唔似十八、廿二咁手拖手sweet sweet，不過喺一啲細節位絕得睇得出男友嘅細心，好似等過馬路期間，蔡曉儀又再擔天望地發呆，但當轉咗綠公仔，男友會回頭提一提醒佢，將蔡曉儀拉返嚟現實世界繼續上路；又例如佢哋呢日出街，點睇都知目的係陪男方買嘢，但見到啱蔡曉儀嘅商品時就會停低研究下，佢手上嘅護腰坐墊相信就係for蔡曉儀嘅，話晒女方不時都會用手撐下腰背，應該係四十有六開始有腰酸背痛毛病啦。
亞視訓練班出身嘅蔡曉儀，當年因被指似李嘉欣成為亞視當家花旦之一，一度同萬綺雯齊名，可惜02年後消失幕前12年，事後得知原來佢精神狀態出現問題。而家有個男友喺身邊傍住行下街，過返啲平實日子，相信蔡曉儀情況會越來越好。
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|