前港姐冠軍馮盈盈說話肆無忌憚，當選以來，出位言論夠出語錄，早前她於節目又再亂噏廿四，竟將港姐與「做雞」和「公廁」拉上關係，引起網民熱議，有港姐前輩更對她有微言！昨日馮盈盈急撲火強調非個人意見，義氣女拍檔麥明詩更攬上身，硬認有份一齊講。
馮盈盈、麥明詩和陸浩明等主持的節目《#後生仔傾吓偈》以語出驚人作為賣點，本月10 日播出的第178集內容提及「港姐嫁有錢人」，她又再爆Seed ！陸浩明先勾起話題：「如果男仔入贅就畀人話食軟飯。」盈盈聽罷突然激動地說：「如果我哋嫁畀有錢人，就畀人話睇死佢想釣金龜係雞！係公廁！」麥明詩亦幫口說：「畀人話選港姐就係為咗咁！」
麥明詩攬上身話有份講
對於被指失言，馮盈盈昨日解釋「公廁論」並非由她講，真正的始作俑者是網民：「我係覆述緊一啲食花生、不懷好意嘅網民言論，唔係代表我嘅意見同立場，我對呢啲言論持反對意見，我唔認同！女仔去搵想要嘅婚姻，有乜問題？應該自主去掌握幸福，我係為女權平反，希望大家公開討論同正視。（覺得用詞太露骨？）其實網上攻擊女性嘅用詞，再粗鄙啲、露骨啲、具攻擊性啲，我只係拎出嚟討論，要正視嘅係點解喺網上攻擊人就冇問題？拎上節目講就有問題？」她覺得節目尺度也是有價值的討論。陸浩明亦撐盈盈只是轉述網民睇法，麥明詩更加攬埋上身：「佢講嗰啲同我講一模一樣， 你當我哋係集體表示得我唔會勸盈盈，佢冇問題，只係拎出嚟講，唔需要避忌。」
朱潔儀：咁肉酸嘅！
不過，「公廁論」卻令港姐前輩有意見，2010年港姐季軍莊思明大感不該：「唔好話佢係港姐，就算係公眾人物都唔應該喺個節目咁講，個節目咁多年輕人睇，首先對自己個形象唔好，第二會有損香港小姐嘅身份，第三佢會影響到新一代嘅想法。我唔知佢咁講係咪為咗節目效果同想Keep住有Noise，但成個感覺好Cheap，佢可以用其他字眼表達， 唔需要用到咁激進嘅字眼，唔好為出位而用呢啲字眼。」前港姐亞軍朱潔儀則說：「冇聽過人哋咁講過港姐，邊度聽番嚟？咁肉酸嘅！以前選美時，啲總監教我哋做港姐要慎言。」
更多新聞，請瀏覽東方日報網頁：
http://orientaldaily.on.cc/
|
鍾意就快D Share啦！
|
|
|