袁彌明近年從政之餘大搞美容生意，成為上市公司老闆娘，現時擁有九間門市，今日旺角舖翻新開張，老公林雨陽一如以往來撐場。兩公婆早前仲去咗美國睇美容展覽，袁彌明話：「平時呢啲展覽老公都會同我去，一齊行幫我收集資料，拍片影相，係一個好幫手，加上老公嘅媽媽同家姐都係用慣靚嘢，有咩產品畀我老公一試就知掂唔掂，老公係好重要嘅白老鼠。」
另一半係得力助手，不如索性一齊合作投資？袁彌明話：「老公投資喺我身上就得啦，佢有佢事業，而且屋企好多嘢都要佢搞，佢係屋企嘅manager，兩夫妻唔好日日一齊返工，會好多拗撬，我又係老闆，唔想只有佢聽我講。」
袁彌明哥哥袁彌昌與容海恩早前結婚（新聞連結： http://bit.ly/2NR0WbC ），家有喜事，阿嫂有好消息，已經陀B四個幾月，袁彌明話：「哥哥係長子嫡孫，佢哋應該係陀個囡囡，未有仔啦，好似都四個幾月喇，佢哋又搬咗屋啦，屋企都有啲變動，我都就快做姑姐。」
咦，之前容海恩大賣關子，點都唔肯講陀「豬仔」定「豬女」，話要俾個機會傳媒估吓先好玩喎，依家咪俾姑仔踢爆咗？
不過袁彌明話自己對生B心意已決———就係唔生。「見到朋友湊兩三個小朋友做全職媽咪，24小時畀晒仔女，自己好難做得到，要打理生意之餘好多地方想去，去得嚟都生唔出啦，我同老公都好渴望有一個自由同寧靜嘅家。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
