景黛音當年拍劇與不少猛人合作過，當中對周潤發、趙雅芝及梅艷芳印象最深，鄭秀文則是她最欣賞的後輩藝人，玩微博亦是因為她。
發哥介紹做老婆
「我第一個劇《上海灘》，我做佢老婆，嗰時好似訓練班未畢業。我好鍾意佢，佢係一個好照顧新人嘅人！當日記者招待會，我哋梗係企晒後邊，主角企前面，佢就好nice咁話『呢個係我老婆』，畀我企喺佢隔籬。佢呢樣嘢好好，好值得人學習。」
趙雅芝幫蓋披風
「我又好鍾意佢，佢係個好好心地嘅人，好記得嗰時我哋拍《上海灘》拍通宵，瞓喺梳化度，我真係好記得好記得，佢攞件披風幫我冚，我諗佢或者唔記得啦，所以我話對我好嘅人我樣樣記得，我又唔係一個特別角色。」
梅艷芳同遊日本
在梅艷芳擔正的劇集《香江花月夜》中，景黛音飾演小杜鵑，跟蔣麗萍同樣是第二女主角。景黛音跟阿梅原來私底下是好朋友：「佢係一個絕頂好人，我同佢一齊去過日本㖭，佢好鍾意一大班朋友。」
鄭秀文人品好好
「我好欣賞佢，見佢有微博喎，咪跟佢玩吓佢真係好nice，我比較鍾意佢本身人品多啲，佢哋喺圈裏面成就唔係咁重要，唔係因為佢紅唔紅。」
|
鍾意就快D Share啦！
|
|
|
