（法新社圖片）
歐聯之王C朗，去到新東家祖雲達斯嘅首場歐聯賽事，踢唔夠半個鐘就被趕出場！斑馬兵團作客華倫西亞，C朗全球矚目，但佢於29分鐘同敵衞謝臣梅里路於禁區內發生碰撞，後者跌低後，C朗忍唔住用手推咗佢個頭一下，雖然唔算大力，但旁證即時向球證舉報事件，球證隨後直接拔紅將C朗趕出場！
C朗屬歐聯史上最成功球員，曾五奪歐聯冠軍、七奪神射手，個人獨攬八項紀錄，離開皇馬後當然想繼續省靚招牌，強勢為祖記爭標，點知首仗就領紅出場。C朗當時想殺入禁區爭取射門機會，謝臣梅里路就緊嘜住佢，雙方身體發生碰撞致後者跌低，C朗可能覺得對手扮嘢，趁佢坐喺草地出手推頭。
之後旁證向球證舉報，賽事停止咗數分鐘，之後球證叫C朗埋嚟，當時C朗個樣仲係好從容，點知球證出示紅牌。C朗見到後好激動，即刻成個跌坐地上雙手拍地，並眼泛淚光。經過一輪擾攘後C朗提早返入更衣室，途中撳牆雙肩抽搐，極可能係激動狂喊。C朗今次係首次出歐聯領紅，如果佢之後停賽多過一場，就未能隨隊到奧脫福作客舊會曼聯。
雖然祖雲達斯有主力領紅打少個，但球隊仍憑比真歷射入兩個12碼，以2:0力挫華倫西亞。
東網體育FB同你追實體壇每個精彩時刻！
http://bit.ly/2ecTF2A
來源 source: http://hk.on.cc
|
鍾意就快D Share啦！
|
|
|
