「美人飯局」事件曝光後引起極大迴響，不過受盡千夫所指的「飯腳美人」Karen，其實只是代罪羔羊，有知情者向《蘋果》爆料稱，餐廳的美女老闆才是幕後主腦，以豐厚的薪金操控大批「美人」跑數。據知，美女主腦營運「美人飯局」模式已近兩年，其間除了不斷轉換餐廳外，更聘有經理、「約飯妹」及「飯腳妹」等，當中以最高時薪100元招攬「飯腳妹」陪食飯，另再拆賬單百分之四作佣金，一晚收入隨時過千元。
記者：莊建鑫 黎少英 阮斌
「靚女老闆好後生，廿幾歲，周身名牌，成手紋身！」孰知內情的Kelly早期曾參與「美人飯局」的工作，據她所知，美女老闆叫Ceci，近兩年開始經營餐廳及酒吧，都是以「飯托」和「酒托」模式營運，但每次都以短租形式不斷轉場，「當個場爆咗鑊，佢就會轉個第二間。」
Kelly表示，過往有不少中招的男網友因氣忿難平，多次在網上開post數臭餐廳，「試過有個客上嚟嘈，真係爆晒粗，差啲要報警。」而每次Ceci都會退錢罷平事件，但Kelly對她這種經營手法大感不滿：「佢根本唔理啲女仔的安全，試過有女仔被人喺樓下伏，佢只係話冇事嘅，唔使驚！」
「美人飯局」的雛型全靠美女主腦一條龍經營，由開舖、大廚、搵客、收錢等，都由Ceci一腳踢，「佢有多部電話，喺網上面開好多個帳戶，用不同嘅女仔相喺交友App約男仔食飯。」不過由於落搭的男網友太多，其後她開始以時薪65元聘請「約飯妹」，「但係啲女仔返工只係負責喺App識男仔，再約佢哋到餐廳食飯。」而Karen最初亦只是「約飯妹」不需陪食飯。
為讓餐廳客似雲來，Ceci精心挑選另一批「飯腳妹」負責陪食飯，更抬高時薪到100元，另全單拆賬百份之四，以利誘「飯腳妹」大刀闊斧劏客，「張單愈大，啲女仔拆賬就愈高！」以「飯腳妹」每日下午5時至凌晨1時返工8小時計算，再加每日至少約會10個客人食飯，每枱埋單1,000元計，日薪就高達1,200元。每當「飯腳妹」開工，Ceci會給予每人一部手機與男網友聯繫，確定見面時間和地點，其間Ceci會在幕後操控，由點餐的食物到何時離枱，都一一透過WhatsApp指示。
至於負責在餐廳落單的短髮女經理，據另一名知情者透露，她是美女老闆的頭馬，名叫HT，據知她在女同志圈極為活躍，並滲入多個女同志群組搵客，特別是有「group 聚」，HT就提議到「唐三樓Café」包場，人頭費約150元，但收費相當浮動，「覺得佢做生意好唔老實，要我哋先過數，有時仲會話唔夠，要畀多啲！」惟食物味道「超難食」，她補充這些「暗黑料理」全由老闆Ceci與其TB男友操刀。
由於HT眉精眼企，她在餐廳的角色不只是落單，而是留意客人一舉一動。當發現客人屬麻煩型或醒目型，會立即想辦法將客人送走。記者早前親身放蛇時，就發現HT裝作為Karen落單，但實際上留意住記者的反應，當記者問長問短，又要求睇餐牌時，HT斷定記者是不宜劏的客人，最終Karen主動取消飯局送走記者。
據記者連日追蹤，在Karen的惡行被踢爆後，餐廳一度停業數天，除客人訂場搞party外，其他散客一律拒接。其中一天，記者見其頭馬HT帶走一直放在餐廳的倉鼠回家，以免因為餐廳不開業而無人餵飼。停業其間，HT就與其TB好友到郊野公園及行街食飯。惟報道刊登後，涉事的太子「唐三樓Café」昨日無開門，「腳飯妹」、經理及美女老闆均無出現。
你敢爆，我敢獎！ 立即WhatsApp《蘋果》24小時爆相爆片熱線或致電：63836568
|
鍾意就快D Share啦！
|
|
|
