佘詩曼、周家蔚及李靄璣等昨晚出席時裝品牌活動，阿佘雖然穿上貼身裙騷長腿，但仍不夠超deep V的好友周家蔚搶鏡。阿佘早前接受《魯豫有約一日行》訪問，大爆當年爭視后時曾被對手白眼。阿佘當年對手有鄧萃雯、張可頤及黎姿等，雯女日前已回應︰「嗰個實唔係我，我散光㗎！乜都睇唔到。」
阿佘昨日亦還雯女一個清白︰「首先要講嗰個絕對唔係雯女，因為佢係一個我好欣賞嘅演員，仲同我一間中學，係我師姐，大家唔好有誤會。因為上清談節目，個主持問到我至講番件事，目的唔係要傷害任何人，不過你上得節目，如果乜都話冇，呢個唔會係好睇嘅訪問。」
「年輕唔懂事」
阿佘指事件已經事過境遷，多年後她與「白眼」女星關係亦修補了︰「𠵱家同嗰個人變得好好關係，人總會成長，可能以前大家年輕唔懂事，之後都有合作過。」問到現在是否沒有人敢再白眼她，阿佘笑說︰「𠵱家有人再白眼我，我會整到佢笑為止。」
近日阿佘憑《延禧攻略》角逐華鼎獎最佳女配角，她開心說︰「係意料之外，其實得獎與否唔係最重要，但第一次演奸角就得到大認同好感恩。」至於會否演奸角演上癮？阿佘覺得見好就收︰「唔係怕演奸角，只係想試多啲唔同戲路。」
周家蔚昨日deep V上陣，她笑言出門口時有着披肩，所以老公洪天明也不知情，她又言：「之前同老爺（洪金寶）去康城都着過低胸裝。」提到阿佘入圍華鼎獎，周家蔚大讚對方勤力：「佢IQ同EQ都爆燈，我哋姊妹有乜事都會問佢。」
採訪︰馬建華
攝影︰沈健程
|
鍾意就快D Share啦！
|
|
|
