「雖然我依家咩都無，我會努力打動你嘅芳心」，一句扣人心弦的獨白，是否能夠取悅心上人？近日網上瘋傳片段，39歲的A0大叔「占士邦」James鼓起勇氣，在鬧市向暗戀多時的𡃁模CoCo（袁晴晴）跪地表白，惜最終「兵敗將亡」，更換來一堆嘲諷與冷笑。James向東網深情剖白，盡訴自己對愛情的看法，愛上CoCo，全因......
James認識CoCo，已有5、6年之久，最初是從Facebook留意到這個令他魂牽夢繞的女神，一直保持朋友兼粉絲的關係，間中會到她工作的地方探班，「心入面係鍾意佢嗰隻，但唔敢同佢講。」喜歡原因，他直言「冇得解」，因為喜歡一個人不需要原因，而CoCo的身材及工作態度都是吸引的地方：「佢除咗學歷之外，才華同天份都幾高，轉數快。」
跪地求愛需要掏出不少勇氣，James不諱言：「心口掛住個勇字，橫死掂死，我係佢其中一個粉絲，咁咪盡地一煲，唔博一博都唔知有冇機會。」他又透露，求愛計劃由構思、策劃、到準備道具，籌備了幾個星期，單單在表白前調節心情，都用了兩個星期，「唔通兜嘢行出去同佢講咩！」
短片瘋傳後，不少網民掘出Coco的拜金黑歷史，但James卻不相信對方是個拜金女：「佢哋都只係網民，我係親眼見過同認識過，咁我又唔係好睇到網民所講嘅反應。」而因為一句「有樓有高潮」而出名的Seasun，在示愛過程中不斷出謀獻策，James坦言她的說話「令我個心哽住哽住，唔開心」，不過相信CoCo有智慧處理，而「聽話」交出鎖匙，是因為「當係交心出去。」他亦相信能養得起CoCo，「為咗鍾意嘅女人，咁我寧願打多幾份工，兼職都可以搵到錢。」
距離表白失敗已經超過1星期，不過James表示心情仍未平復，暫時不會與Coco聯絡，亦不敢去想再次表白，「暫時唔想再令佢唔開心」。他續謂，其實沒有想過表白會成功，希望外人不要再騷擾CoCo，「你愛你嘅女人，都唔想其他人傷害佢。」
電話訪問到最後，記者問有沒有心聲要向CoCo訴說，James坦言沒想過事件會引起如此大的回響，令CoCo遭人話柄：「純粹表達我愛意啫其實」，之後話筒突然一片靜默，未幾他語帶哽咽，表示「要抹一抹眼淚」，原來勇字當頭的他，已悄然落下男兒淚...
曾出書教人追女仔的林作分析，事件反映部分港男追求異性的手法水平低劣，毫無策略，不願意花心機學習。而James的示愛過程，更有4大「死因」：
1.應選擇合適對象
「森林咁大唔係個個女仔都追到，人哋話天下冇追唔到嘅女仔完全係亂嗡 ，佢最大問題係鍾意上一個唔應該既人。」
2.間接地接觸
「佢基本邏輯都唔明，跪低拎住紮花係嚇死人，女仔係喜歡傾得埋又體貼嘅朋友，做到天下最了解佢嘅係你的話，都有一定機會。」
3.必須忽冷忽熱
林作認為，要忽冷忽熱傳對女士的訊息，別以為熱情如火就能夠「炸溶」對方，但明顯James完全唔識冷，只懂過熱，必須軟硬夾攻。
4.要被視為渴望對象
男士必須製造出令女方欣賞的感覺，絕不能夠讓對方認為自己是籮底燈，「即好毒嘅，淨係得你一個，從來冇女仔吼，係絕對唔得。」
林作追女建議亦有4點
1.應該認清自己性格，顯示出魅力，達至「吸女仔」效果。
2.如男士要追求拜金女，不妨以退為進去讓對方放下戒心，令其發現最喜歡的是真愛。
3.「Be careful what you wish for，真係得到嘅時候，最後可能發現心靈另一地方需被滿足。」「有樓有高潮」其實非常膚淺。
4.行為不符邏輯，我行我素的男性人反而會吸引女士喜歡，所謂「男人不壞，女人不愛。」他認為，這與達爾文的進化生物論有關。
最後，林作表示自信是尋找伴侶的第一要訣，撇除外型或事業等條件，男士需由內在發出「掂」的感覺，肯定自己，才可成功溝女。
|
鍾意就快D Share啦！
|
|
|
