歌手黃翊在九展舉行首個演唱會，獲同期90年代歌手朋友到場支持，包括黎瑞恩、經理人鄭瑞芬、文佩玲、鄭敬基、邵仲衡、黎明詩等人。一開始他以快歌《Kiss》打頭陣，與女舞蹈員又跳又唱，之後雀躍跟大家打招呼：「等咗呢刻超過30年！由86年參加新秀到依家，真係好開心、感動，企喺呢個台上……」此時他即感觸到眼濕濕，繼續謂：「真係奇六迹！冇唱歌成25年，自己好懷念唱歌嘅日子，畀10秒我感受下呢30年久違嘅掌聲！」大家即歡呼尖叫，令他十分感動，然後唱出《一世濃情》、《痴心不變》等歌。之後有個女歌迷上前獻花，他叫對方上台，之後更又拖又攬對方，並向她唱情歌《喜歡愛你》。之後他扮節目《我是歌手》唱歌，如扮G.E.M.（鄧紫棋）飆高音唱《龍捲風》。
舊愛黃寶欣合唱
期後他唱《酒杯敲鋼琴》，舊愛黃寶欣上台一起合唱，唱完後黃寶欣表示：「你終於開屬於自己嘅演唱會，好戥你開心，我好多嘢想講，但又驚觸動到。」隨即聲震震表示：「好感觸，最近我哋出番嚟，好多人都有講番陳年舊事，講我哋嘅關係，總之黃翊有咩要我撐，我一定撐！」兩人即有點眼濕濕，隨即黃寶欣大爆：「其實大家唔知，黃太近日身體唔好，其實兩個星期前佢喺深切治療部昏迷咗9日，我哋好擔心，但黃翊一直撐住咁健身、練舞，識咗佢廿幾年，佢嘅努力我好佩服、感動！但好彩嘅係，黃太喺幾日前已經醒番，仲得到好好嘅治療！」大家即拍手支持，黃翊即開玩笑謂：「我特登唔爆我老婆，點知你爆咗，依家輕鬆咗好多，佢依家愈嚟愈好，令我可以專注唱歌。」隨後他更獲囝囝獻花，又落台與家姐攬攬。
太太突然昏迷
唱完張國榮的《追》後，黃翊提起太太，表示太太是10月9日早上突然在家昏迷：「好驚，狀況好難搞，即刻送院檢查，好彩身體入面冇出血，但一直昏迷，到第二日係有擘大眼，但其實係完全感受唔到周圍，係冇反應，見到呢個情況更擔心，同時演唱會又準備得如火如荼，有朋友問我會唔會取消演唱會，但我又諗演唱會籌備咗咁耐，唔係話唔會為太太而取消，但我又唔想捨棄3000個歌迷，所以繼續演唱會，同時盡量抽多啲時間陪太太，好彩早幾日佢終於醒番，開頭佢都係講唔到嘢，同埋瘦咗好多，但經過幾日治療，身體同精神都愈嚟愈好！」大家即拍手支持，然後他就借囝囝的手機拍片，叫大家向太太講加油，隨後唱出為太太寫的《愛到底》，期間台上播出一家三口的合照。
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|