45歲嘅孫耀威，今年11月舉行第一個演唱會，呢個心願足足等咗26年。
26年，佢曾經贏在起跑線，亦嚐過俾唱片公司雪藏，被迫如轉行般，返內地當演員拍劇。
「首先每次離開樂壇都唔係自己嘅決定，都係好似好老土咁講，人在江湖，身不由己，當年十幾歲出道，合約完咗，有好多音樂理想，同唱片公司唔係好咬弦，於是出現嗰啲唔知係雪櫃定係封殺，令我無辦法出唱片，就是我就好似轉行咁樣，去咗內地拍劇。」孫耀威說。
十年前，難得獲批紅館期，但因時間倉促被迫放棄，幾年前一切準備就緒開個唱，又遇上失聲。
「人算不如天算，突然聲帶出事，嗰兩年突然間聲帶一唱歌就爆血管，後來至發現原來係胃酸倒流影響。一唱就爆血管，照入去真係睇到血淋淋，所以又舉行唔到，嗰次都幾唔開心。」
不過最唔開心，也不及從商初期，是他人生一場黑暗歲月。
幾年前同朋友柴娃娃搞生意，最初諗住淨係出錢唔會理，因為我做嘅生意全部都係好靚嘅嘢，例如造衫，又或者以前做嘅，每支酒都係一個藝術品，又同一位法國設計師一齊設計傢俬，所以我啲酒吧、餐廳全部都係我設計嘅梳化、杯杯碟碟、員工制服、圍裙，連廁所通渠阿伯套制服都係我設計，其實我好鍾意玩呢樣嘢，點知發覺原來做落之後，唔係話你鍾意做就做，鍾意離開就離開，當你發現投資咗咁多錢，仲有好多責任喺度嘅時候，原來係無得甩身嘅，無機會做決定之下已經俾盤生意困住咗，到後來仲有啲因為蝕錢而有好多後遺症要去處理，股東又失蹤晒，我係一個名人於是所有人嚟搵我，經歷咗好辛苦嘅幾年時間。」
最傷的不是投資損手失千萬積蓄，而是友情。
「其實做生意最大嘅挫折，反而係一啲好朋友一齊去做，但遇到問題嘅時候，大家大難臨頭各自飛，呢樣係最傷心嘅，因為就算啲錢搵唔番，只要每日食得飽，唔會餓死老婆已經OK。但係好好嘅朋友一齊做生意，到最後變成咁樣就最傷心，所以你問我會唔會後悔，其實係一定會後悔，同埋會有好多遺憾喺呢件事裡面。
其實的確係人生一個幾悲慘嘅階段，但我覺得亦都一個好重要嘅階段
但亦都因為咁，自己長大咗好多，亦都貼地咗好多，先知道原來一直都係喺溫室長大，原來自己都可以好硬淨。」
去年決定給陪著他經歷風浪的女人，一個正式的名份。
「Macy係一個喺我身邊好重要，會借膊頭俾我喊嘅人，因為成件事佢都同我一齊經歷，所以過去十年高高低低其實佢都喺身邊。
佢係最能夠令我做番自己嘅女仔，你唔會介意俾佢見到你嘅弱點。
由細到大我係我行我素，無論財政或者人生每一步嘅決定都係好自我，而家多啲學識去將自己呢個單位，理解成唔淨係得自己，仲會連住一個老婆。所以依家再做生意，都會小心好多，更加保守去做，唔可以好似細個咁樣，爛命一條，恃住仲後生，而家唔可以咁樣，全部都要睇得準啲，寧願行慢啲去做。」
立即下載Apps，隨時隨地睇盡時政專題、深度偵查、娛樂熱話！按此連結： http://bit.ly/next28app
|
鍾意就快D Share啦！
|
|
|