下個星期五，就到陸漢洋同苟芸慧結婚喇，佢哋嘅婚禮會喺上水雙魚河舉行，而主題仲會係「童話故事」，真真正正係「童話式婚禮」。陸漢洋接受周刊訪問嘅時候，講到原來呢個童話式婚禮，一開始係嫌幼稚，直到佢聽咗苟姑娘嘅理由，就即刻答應，原係因為苟姑娘覺得同陸漢洋由拍拖到結婚，都係好似童話一樣。
陸漢洋又講到點娶得美人歸，佢就話絕對唔係因為錢，因為佢啱啱識苟姑娘嘅時候，苟姑娘以為佢只係一個UBER司機，仲話主要係靠上進心先追到苟姑娘。陸漢洋仲講到唔會擔心苟姑娘被搭訕，佢話因為每次有男人向苟姑娘搭訕，佢都會諗呢個女人係屬於自己，同埋苟姑娘對男性朋友都會有一條好清楚嘅界線。
一對新人嘅結婚相去咗法國、加拿大、韓國影，不過大多數嘅相都係睇到苟姑娘有幾靚，好少見到新郎哥，陸漢洋就因為覺得自己醜，所以少咗上鏡，同埋又覺得老婆好靚，想將嗰一刻好好地保留。
苟芸慧日前喺巴黎出席一個香水活動，呢個活動係最後一個單身工作之旅，除了參加慶祝派對，還進行咗拍攝工作，佢話：「這次巴黎之旅，遇到很多美人美事。雖然行程非常緊湊，但製作團隊十分專業，再配合了近乎完美的天氣，一切順利完成，十分感恩。」
而早喺5月時，苟芸慧同陸漢洋特地去到韓國拍攝婚照，對住鏡頭擺pose苟芸慧緊係輕鬆啦，但係新郎哥就相對緊張喇，仲破天荒第一次著粉紅色上身，而擁有四份之一韓國血統嘅苟芸慧喺影完相之後仲帶埋未來老公一齊遊首爾，跟住苟導遊周圍食嘅陸漢洋就算有肚腩都唔怕啦。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|