藝人陳展鵬與女友單文柔（Phoebe）今日假四季酒店舉行婚宴，兩人比預定時間遲了一個小時會見傳媒，兩人換上另一套禮服，Phoebe身穿tube dress款婚紗，展鵬則穿上寶藍色西裝。當記者要求兩人錫錫時，展鵬表現怕醜，他婉拒說：「我哋一陣會發相，會發啲錫得靚啲嘅相畀大家。而且呢啲台上會做。」
提到中午在船上註冊時，Phoebe坦言當展鵬宣讀誓詞時令她最感動：「其實誓詞係我哋平時拍拖時講，佢話未遇到我之前係一個個體，依家結為夫婦，大家各自減去一半融合成為一個個體，聽到嘅時候都幾感動。（點解喺船上簽字？）大家有個共識，想難忘啲。」
唔透露婚戒卡數
展鵬稱想在清靜及安靜環境下進行儀式。問到有甚麼愛的宣言，展鵬稱要留待之後再講，但新娘子則踢爆對方﹕「佢反而有同我爸爸講。（講乜﹖）留番啲秘密畀我」展鵬笑謂：「都係嗰啲，會令佢個女好幸福，會錫佢。」Phoebe透露早上有不少結婚儀式刪減了，加上她不忍心老公被姊妹玩，所以沒有玩新郎環節，問到有否畀開門利是？展鵬講笑說：「調番轉就好。（唔使畀人玩好開心？）唔係，拍籌備婚禮短片嘅時候畀人玩唔少，不過好多謝兄弟姊妹幫手，我哋今次有武師，婚禮上播出來嘅短片係會有動作，係搞笑，仲會重溫番我哋相識故事。」見新娘子手中的鑽戒相當巨型，接近兩卡，但Phoebe不肯透露卡數：「唔講呢啲，我都唔知，最緊要係心意，呢樣係紀念，我好大頭蝦，希望一直保住隻戒指，唔會唔見。」
老爺滿意新抱
另外，展鵬的母親雖然中風，但亦有到場，展鵬稱母親很開心：「尤其係我爸爸，佢平時比較cool同埋少出聲，但睇得出佢好開心，今日見佢望住個新抱仔，個樣尷尷尬尬，微微笑咁樣，好滿意咁。」Phoebe補充說﹕「老爺同我講咗句，叫我好好照顧展鵬，即係佢哋都好滿意我。」
至於婚後會否繼續工作？展鵬說﹕「我尊重佢，佢喺呢行其實做咗兩年，好多嘢未試過，好似着古裝影婚紗照都係第一次。（如果太太拍親熱戲呢﹖）電視尺度啫。（咀戲呢？）ok喎，以太太個活力同拼勁，相信佢靜唔到落嚟，佢做唔做嘢我尊重佢。」
隨時復工
展鵬透露今晚與親友食飯為主，幾日後就會再有大型派對與圈中好友一齊慶祝。問到度蜜月﹖展鵬坦言﹕「未諗過，休息吓先，因為婚禮好忙，之前去咗英國同法國影婚紗相，所以唔急去旅行住，希望搵到合適地方再去。（你隨時復工？）我ready，我套劇7月延遲到九月，依家話12月，我覺得最重要寫好劇本同角色，我隨時復工冇問題。」問到造人大計？佢就話：「順其自然，急唔嚟。」
|
鍾意就快D Share啦！
|
|
|