當年軟硬天師的《廣播道Fans殺人事件》歌詞一句「陸家俊我哋支持你！」豹死留皮，事隔二十多年，仍偶有提起陸家俊的名字，加上近年人心思舊、金曲流行，令到已經43歲的陸家俊有價有市。目前以「DJ DRAGONBALL」之名任打碟DJ，他預告稍後會回應召喚重現幕前，亮相金曲節目，首要是兩個月內減重40磅。
採訪﹕曹家誠
攝影﹕陳慧安
陸家俊在90年時，年僅15歲就參加新秀歌唱大賽，獲梅艷芳稱讚，賽後迅速加入娛樂圈出碟。軟硬天師的《廣播道Fans殺人事件》歌詞中，亦有提到他的名字。到近年商台少爺占的廣播劇，亦以「陸家俊」與同期歌手「蔡興麟」命名角色，似乎他沒有一刻離開過娛樂圈。
事實是陸家俊加入娛樂圈後，出過碟、拍過劇，不過很快已退出幕前。陸家俊日前接受《蘋果》專訪訪問回憶往事：「我正式出道應該係15歲，到19歲嘅時候有一次拍MV喺貨櫃上意外跌咗落嚟受傷，住咗兩個幾月醫院，好彩仲後生復原得快。之後我就去咗美國進修音樂，喺美國時，除咗玩音樂，平時冇嘢做就係睇番TVB嘅劇，睇睇吓好想試拍劇，於是又返嚟香港加入咗TVB做藝員。」
音樂變平價
陸家俊最記得當年周潤發曾任導師教自己演戲，但最後他還是重投音樂：「03、04年左右開始同朋友一齊搞錄音室幫歌手造歌，見證住成個唱片行業一路萎縮，唱片公司畀每首歌嘅budget越來越少，講緊以前最好景時，可以用幾十萬做一首歌，到我造嗰陣都有十萬、八萬一首。到後來決定結束錄音室時，每首歌budget跌倒得番兩、三萬，加上電腦普及，好多人喺自己屋企都可以做到，咁做乜要畀錢出嚟做。」
結束錄音室生意後，陸家俊索性完全退出，專心替家人打理金融業生意長達十年，直到年前又以另一種形式去延續他的音樂夢：「年幾前開始我喺朋友介紹下首次接觸EDM（電子跳舞音樂），之後去世界各地EDM音樂節開眼界，於是就由零開始學習打碟同認識各樣DJ器材。」
打碟似拍戲
由歌手轉做DJ的陸家俊更取名「DJ DRAGONBALL」，他解釋名字由來是曾替《龍珠》唱主題曲：「另一樣令人記得應該係軟硬，全靠佢哋隻歌到今時今日都有人記得，當然少爺占喺電台廣播劇度叫自己做『陸家俊』都係原因，有一段時間人哋以為我喺商台返工。」他亦沒有深究自己的名字會被用上，他笑說：「嗰時我得16、17歲，軟硬已經係最紅嘅DJ，我邊夠膽行埋去問，少爺占都冇問過，冇所謂啦，問反而仲奇怪。」
轉行做DJ打碟，陸家俊覺得與以前做戲相似：「DJ除咗要有混音技巧外，身體語言要更加大，直情好似做緊舞台劇咁，當年詹Sir（詹瑞文）喺TVB教我哋做戲嘅嘢，全部都用得番。因為觀眾離表演台好遠，必須要好大動作人哋先睇到你，而且面部表情要好浮誇，我自己都係咁。」除了打碟，陸家俊亦籌備製作自己的單曲﹕「全球百大DJ每個都有好多自己作品，自己做開幕後，其實都要快啲製作。」 因為打碟，令陸家俊重燃對音樂的熱情﹕「喺外國音樂節，睇到啲DJ點樣喺個有幾萬人嘅場地度表演，成件事令人非常激動。」
減磅上節目
近日無綫節目《流行經典50年》，邀請過不少80、90年代歌手亮相，繼早前蔡興麟亮相後，不少網民亦召喚陸家俊登場。陸家俊直言會響應召喚：「其實個節目監製係我朋友，佢有搵我，我亦應承咗嚟緊12月會上，因為𠵱家肥咗好多，畀多兩個月時間我練吓歌、減吓肥先。」他表示目標是兩個月減40磅：「因為我為食，所以好易肥，我目標係減到150至160磅上鏡就差唔多啦。」
場地提供：BOOM LAB
|
鍾意就快D Share啦！
|
|
|