「Well friends 別要替我灑淚兒
彼此都不捨 但世上永有分別時」
－－《Miss You Much》作詞：林振強
「鬼才詞神」林振強（Richard）妙筆生花，精於天馬行空帶出歌詞主題，《壞女孩》、《每天愛你多一些》、《笛子姑娘》、《零時十分》、《每一個晚上》...首首動人心弦，惟03年11月16日，林振強因淋巴癌於瑪麗醫院病逝，終年56歲，天妒英才！
悠長15年過去，近年廣東歌地位低落，林振強的詞作卻永垂不朽，跟他相識一場的朋友，念念不忘這位才華傲絕的天才詞人；84年的流行曲創作大賽上，林振強憑《空櫈》獲冠軍，潘源良雖然輸了，但兩人卻惺惺相惜；今天，潘源良仍深深懷念故友：「輸給林振強冇話可說，嗰次第一次見，我仲記得好清楚，佢話好鍾意我寫嘅嘢，其實當時我只係寫過林子祥《邁步向前》、泰迪羅賓《天外人》，我嘅事業啱啱起步，林振強已經寫咗幾年，作品好流行，香港寫詞人一個奇才，佢話鍾意我寫嘅嘢，我覺得好開心，難得有個好似哥哥嘅人幫我打氣。」
兩人成為好友後，有空就相約飲咖啡，潘Sir很欣賞這位天才橫溢的朋友：「我諗同所有8、90年代樂迷一樣，對於佢寫每首歌都非常之鍾意，畀我哋好多創意，甚至效法佢寫歌詞，佢嘅作品柔情又有，貪玩又有，男女感覺又有，天馬行空從另一角度講生命又有。佢係一個好鍾意電影、音樂、文學嘅人，佢同我講，有時睇到人寫得精采拍得好，佢會寫喺本記事簿，佢話有時諗唔到一隻歌點寫，佢會睇記事簿，嘗試可唔可以咁寫呢，佢係參考好多嘢，我嘅睇法當然絕對唔係偷，如果你偷得咁叻先講，佢係有好多功課做咗。」
林振強是一個寡言的人，但在創作上卻帶出無限色彩，對樂壇影響巨大，潘Sir坦言：「的確喺佢之前，對廣東歌處理歌詞上冇咁現代化，冇咁鬼馬活潑，佢會用好多唔同表達方法甚至詞語，故意加啲英文，舉例葉蒨文《200度》，原來廣東歌可以消化英文，呢啲係佢帶嚟廣東歌特別嘅地方，後來大家覺得可以發揚光大。」兩人更曾合作填詞夏韶聲《車站》，潘Sir將手稿保留至今：「好似接龍咁寫，嗰時fax年代，過程難得同開心，最後佢由頭到尾跟一次，半夜兩三點完成版本，佢fax過嚟後，話自己冇電要瞓。」
至於林振強的為人，潘Sir更大讚：「佢好好，從來唔會轉彎抹角，睇佢《洋蔥頭》漫畫都知，對於佢認為需要珍惜嘅好珍惜，認為要表達提醒嘅都盡力做，我哋無所不談，都係屬於唔係好識發脾氣嘅人，見到社會不平將佢轉化成創作，佢更加多途徑，又寫文章又畫卡通又寫歌詞，有乜見解都用呢種方法表達。」
意氣風發的林振強，01年不幸被癌魔纏身！潘Sir憶說：「嗰年盧國沾老師攞CASH終身成就大獎，我哋都有參加周年晚宴，因為嗰段時間Richard四圍飛，臨走我同Richard講：『你係咪jet lag好緊要？見你唔係好精神，你休息多啲喎，面色唔係幾好。』佢話：『好吖，冇嘢，睇吓幾時得閒又飲咖啡。』大約1星期後，佢打電話同我講，佢話發現咗少少cancer嘅可能性，正在化驗同處理緊，佢話呢樣嘢唔想畀人知，佢覺得我好關心佢，咁都睇到佢唔舒服，所以唔應該隱瞞。」
之後，足足有年多時間，林振強一直接受治療：「中間有啲up and down，有段時間佢好番啲，佢又會叫我哋上佢屋企食飯聚吓，嗰時佢唔係好方便出街，因為啲塵埃、空氣污染，所以佢想見我哋，就會約上佢屋企，佢最後入醫院時，唔係好畀我哋去接觸，都係家人照顧佢，嗰時佢話：『如果我冇事，出返嚟食飯』我所知佢有香港最好嘅醫生同最好嘅護理，但始終...實在可能佢家族有咁嘅基因！」
03年，林振強最終敵不過癌魔，走了！林氏四姐弟都因癌症告別人間，今年，其胞姐才女林燕妮亦因肺癌離世，潘Sir感嘆說：「當然呢個係香港好大損失，我都成日想像，如果佢哋仍然喺度，好多事情大家可以商量吓，聽吓佢哋意見、想法，但人就係咁，我哋咁嘅年紀亦要接受生老病死係常態，佢個妹同細佬我唔熟，只係講林燕妮同林振強，佢哋本身喺香港貢獻好多精彩創作、想法、意見，我覺得佢哋人生好與別不同。」
最後，有甚麼想跟天上的林振強說呢？潘Sir：「好掛住佢，我好掛住佢，其他遲吓有機會飲咖啡先傾！」
撰文：余燕儀
攝影：林德雄、廖達燊
場地：The AIR (The ONE)
【編輯推介】
【胞姊按掣火化】儀式僅五分鐘 親友灑淚送別藍潔瑛
http://bit.ly/2zcEwIO
【君如似足阿媽】賀老父夏春秋結婚54年 吳君祥嘆珍惜眼前人
http://bit.ly/2PY2zof
【全球華語金曲獎】歌手不滿大會「中港親疏有別」棄獎走人 主辦斥欠尊重
http://bit.ly/2TcBjRM
【火頭辣到曾國祥ig】火炭麗琪tag王敏奕熱情狂插：你條八婆做過咩心照！
http://bit.ly/2K6ecEg
【官方都擺烏龍】桐谷美玲赴倫敦出席《怪獸2》首映 被認錯係韓星金秀賢
http://bit.ly/2B8jRXJ
|
鍾意就快D Share啦！
|
|
|
