查良鏞逝世，網上流傳一幀舊照片，倪匡看見，數數人頭，有他、金庸、古龍、孫淡寧和蔣緯國，共聚於80年代初台灣石門水庫賓館，「得番我一個」；他又看見另一幀跟金庸的合照，同場還有黃霑、林燕妮和張徹，「兩張相都係五個人，都得番我一個」。問他寂寞不寂寞，他說早已習慣，「當佢唔嚟搵我咪得囉」。
自從60年代初開始在《明報》寫武俠小說，倪匡致電金庸不超過兩次，「永遠都係佢搵我」，包括在北京會見已故中共元老鄧小平，金庸也邀他同行。倪匡一生胡鬧，「佢話我無法無天」；金庸好學一生，「真正才子，學貫中西、博古通今」。
金庸含笑歸淨土，喪禮今日舉行，金庸館接受公眾弔唁。相交近60載，金庸學識淵博，倪匡最崇拜，「朋友之間，一有幾分尊敬就冇咁熟絡」，相知也始終留幾分寸，「我見到黃霑就會話衰仔，我見到查生冇可能咁講：『衰佬，你最近忙乜嘢？』」
記者 王家文
筆名金庸的武俠小說泰斗查良鏞，上月30日於養和醫院離世，享年94歲。倪匡說，近一、兩年金庸對外界已沒太大反應，「好痛苦，唔知佢腦筋清唔清醒，如果清醒仲痛苦，腦筋唔清醒反而唔緊要」。幾個月前他探望過金庸，「佢眼擘大咗都冇焦點」，但他伸出手指，金庸會緊緊捉實，「呢個係嬰兒反應，啱啱出世嘅細路哥你畀隻手佢，佢都會捉住」。
「咁精采嘅人都會變咁樣，睇到好難過」，二人相識超過半世紀，因武俠小說結緣，「我對佢崇拜」。
1957年倪匡南下香港，逃避共產黨。起初他做工廠雜工，後來投稿《真報》兼獲聘，當過記者及專欄作家。1961年，金庸創辦的雜誌《武俠與歷史》需要大量短篇武俠小說，主編董千里找上倪匡，「我梗係開心啦」，那年他25歲，「佢問我短篇肯唔肯寫，我最鍾意寫短篇，逐篇計最好」。
寫了幾篇金庸已經很滿意，邀他在《明報》寫武俠小說，每日2,100字，「我喺《真報》寫3蚊一千字，佢畀我10蚊一千字」。第一篇作品《羅浮潛龍傳》，「一日稿都唔斷，佢好佩服我」。首月稿費630元，從《明報》另一創辦人沈寶新手中取過一張「大牛」500元，「我同老婆兩個攞住真係歡喜到呢，嘩，咁大張銀紙幾開心」。
倪匡續以筆名「岳川」在《明報》寫武俠小說，如《天涯折劍錄》、《血影》等；後來創作的「衞斯理」科幻小說列系也在該報連載。共事多年，倪匡八字評價金庸，「一流朋友，九流老闆」。他說站在勞資立場，九流是真，「叫佢加兩蚊稿費，同你拗半日」；換轉友儕相處，一流也不假，「佢好遷就朋友」。
倪匡愛吃魚，每次飯局，金庸總會先夾起魚頭給他，「慌有人同我搶」。有次他吃不下，金庸大喜，「你不吃，我吃」。他嚇呆了，始知金庸也很愛吃魚頭，只是每次都讓給他，「我真係好感動，從此再食魚頭，我同佢都推讓一番，你食我食，不過卒之都係我食」。
每次聚會都是金庸邀約，或是蔡瀾安排飯局。「識咗咁多年，我打畀佢唔超過兩次，永遠都係佢搵我」，倪匡笑說，跟有錢人通電話，可免則免，「佢咁多錢，我打畀佢，可能會諗係咪問我借錢」。金庸曾打開櫃桶給他看，「入面全部都係人哋嘅借條。佢話點解畀你睇，因為入面冇一張係你」。但有次金庸主動找他，赴京見共產黨。
金庸出身於浙江海寧名門望族，父親查樞卿是地主，50年代遭誣陷反革命罪被槍斃。文化大革命期間，他在《明報》撰寫多篇社評抨擊左派暴行，被「四人幫」視為「香港頭號反動文人」。1981年7月18日，金庸獲邀到北京人民大會堂會見時任中共中央副主席鄧小平，相隔20年再次涉足大陸，他邀約倪匡同行，「佢自己驚驚哋」。
當年的倪匡徹底反共，今天也如是，「新華社（中聯辦前身）唔會批，佢話同我辦，辦到咪去囉」。第一次申請失敗，「佢話再去努力」；第二次獲批，但有條件，見首長前要搜身，「我仲以為共產黨好英明，點解會蠢得咁叉交關，我去見鄧小平唔通會帶把刀去？」
倪匡自知不受中共歡迎，「根本唔要我去，如果到時出言不遜講兩句話，捉我又唔好，打我又唔好，幾尷尬，佢知道我不受控制」。最終，金庸成鄧小平復出後第一位獲接見的香港人，還坐大船暢游長江，「待遇好到不得了，又道歉，話殺錯咗你爸爸，勒令當地政府平反」，金庸的武俠小說也自始在內地解禁。
金庸自1955年起在《新晚報》連載首篇武俠小說《書劍恩仇錄》，直至1972年完成封筆作《鹿鼎記》，歷時28年，共創作15部膾炙人口的作品，有華人的地方，就有金庸小說，成就非凡，先後獲本地及海外多間大學頒授榮譽博士。
有次他邀請倪匡出席典禮，但被拒絕，「我覺得榮譽博士係好大侮辱嘅事，畀個榮譽你，即係讀唔到博士資格先畀，對你係一個侮辱，仲咁高興」，倪匡老實不客氣，「當時佢唔出聲，我諗真係受咗啲刺激」。
2005年6月，金庸獲英國劍橋大學頒發榮譽文學博士學位，隨即以81歲高齡，申請攻讀劍橋歷史學碩士及博士，2010年取得首個哲學博士學位。
「查生係一個好博大精深嘅人。」倪匡被喻為「四大才子」之一，他認為莫明奇妙，「放喺我、黃霑同蔡瀾身上都係笑話」，四人中只得金庸一個，真正做到學貫中西、博古通今，也是一個有器量的人，「佢胸襟廣到有時我哋都睇唔過眼」。
「有啲人得罪得佢好下流、好下流，佢都非常睇重」，倪匡不開名批評，「直情人身攻擊到離譜，而且唔係講喎，直情發言為文。佢非但一笑置之，仲好睇重呢個人。我哋好佩服佢，好大器量，係做大事嘅人」。
同處武林世界，游走不同江湖。倪匡坦言，跟金庸性格截然相反，只因興趣相投。二人都是來自江南，同樣欣賞彈詞曲藝，也愛吃幾塊錢一碗的蘇州小餛飩，每次外遊都可談上半天，「我同佢差唔多眼光，睇唔順眼幫佢鬧，唔知幾歡喜」。
有次蔡瀾帶隊去日本摘水蜜桃，「講到天花龍鳳，我急不及待啃咗兩口，查生食過嘛，我望住佢話好似冇中國水蜜桃咁好食」。金庸隨即拍枱示好，「我早就說過，蔡瀾不信」。另一次去韓國吃海鮮，「佢唔鍾意食，但一路跟住我哋食」，嚐過原隻大鮑魚和大蝦，「查生好可憐咁話，畀碗白飯我，搵熱湯撈」。就算老友，倪匡一樣冇面俾，「蔡瀾介紹嘅食物，佢冇樣鍾意食，但照食」。
倪匡風流，金庸也多情，「幾段婚姻，幾浪漫，文人情懷，一定浪漫」。金庸三段婚姻，倪匡只認識第二和第三任查太，「兩個都對我好好」。金庸鬧婚外情時，倪匡不知好歹，去找他第二任妻子朱玫，「我去勸佢，報館老闆有兩個老婆好閒啫，《成報》老闆又兩個老婆，《新報》老闆又兩個老婆，《明報》老闆又兩個老婆，有乜所謂，睇開啲啦」。
性格剛烈的朱玫聽見，沉默一會，「小倪匡，你等一等」，當時倪匡坐在客廳，「我諗唔通勸得掂咁好？」轉頭就見朱玫從廚房走出來，「佢攞起把掃帚，嚇到我落荒而逃，哈哈哈」。事後金庸責怪他多事抵打，「誰叫你亂講」。多年後，金庸接受訪問時坦承愧對朱玫。
倪匡跟妻子李果珍1959年5月20日結婚，當天也是《明報》創刊日。他說，金庸與第三任妻子林樂怡再婚時，也想揀5月20日這一天，但最終提前一日，「我話美國19號即係香港20號，都一樣啦」。
憶故友，如昨日。金庸含笑而去，倪匡認為是解脫，「90幾歲人死咗，有乜好傷心，你真係想佢長命千歲？冇可能嘅事」。古龍英年早逝，他寫下300字訃告；但金庸一生，概括不易，說清更難，「有啲嘢你不能直書，要忌諱、要有分寸……一個人梗有缺點，梗有做唔啱嘅地方，寫又唔得，唔寫又唔得，好難」。
相交一甲子，也有欲言又止時。「我同古龍完全可以乜都傾，但（金庸）有啲嘢唔傾得」。倪匡說，金庸一生，朋友很多，學識更廣，「朋友之間，一有幾分尊敬就冇咁熟絡」，難像他跟黃霑一樣胡鬧，「我見到黃霑就會話衰仔，我見到查生冇可能咁講：『衰佬，你最近忙乜嘢』，係嘛」。
金庸離世後，倪匡在網上看見兩幀舊照片，都是他和金庸的合照，一幀有古龍、孫淡寧和蔣緯國，另一幀是黃霑、林燕妮和張徹，「兩張相都係五個人，都得番我一個」。旁人感慨，但83歲倪匡自得其樂，「我寂寞慣，橫掂我永遠唔主動去搵佢，當佢唔嚟搵我咪得囉」。
金庸的喪禮今日於香港殯儀館設靈。「如果蔡生（蔡瀾）陪我便去，我自己行唔到」。從來倪匡都討厭各種儀式，包括喪禮。近年他多次小中風，「中風嘅人隻手真係自然放喺呢度」，他邊笑邊把手放在腰間，「人一定要死，有乜辦法？」
|
鍾意就快D Share啦！
|
|
|
