藝人陳展鵬同單文柔結婚冇耐就宣布有喜，計番條數明年BB出世就係生肖屬豬，咪以為「豬BB」好似呆呆哋，坊間一直都流傳話豬BB特別有福氣，所以唔少人都計啱數追住豬年嚟生，娛樂圈中人都有好多人出年做父母，依家就同大家數一數有幾多人
樂基兒
現年38歲嘅名模樂基兒（Gaile）上年8月再婚，下嫁圈外男友Ian，於訪問中講過話要努力造人，今個月初終於傳出好消息，預產期係出年四月，第一次做媽咪嘅Gaile話好開心，仲用世界上最好同埋最珍貴嚟形容佗B呢個情況，就知佢有幾高興。
楊愛瑾
現年33歲嘅楊愛瑾（Miki）同郭永淳結婚之後，喺2017年3月生咗B仔Luken，之後佢有露過口風話想追B女湊個「好」字，經過多番努力，上個月喺社交網宣布，屋企即將增添新成員！Miki話懷孕頭三個月比較攰，加上要照顧囝囝有啲吃力，不過就好感恩即將有小生命降臨。
何嘉莉
何嘉莉（Lillian）於2012年同2017年分別誕下大仔同埋囡囡成功湊個好字，當時佢都有講過話夠晒數，不過世事無絕對，上月Lillian宣布意外懷孕，佢自爆曾經試過兩次流產，冇諗過會咁易再有喜，雖然超出預期，但係佢都話好鍾意呢個驚喜！之前Lillian不幸中咗B型鏈球菌，好彩最後都係冇事。
張嘉兒
前港姐冠軍張嘉兒2015年同金融才俊Nathan成婚，一年後喜獲愛女，一直希望35歲前再次做媽咪嘅佢，終於喺界線前一年成功懷孕！雖然唔係第一次懷孕，不過今次佗B佢就話好辛苦，因為成日嘔同埋好易攰，搞到佢每日都淨係想黐住張床唔郁！
張珮汶
前亞姐冠軍張珮汶（Grace）今年四月同圈外男友何駿杰結婚，上月佢就宣布懷孕五個月，仲自爆為咗BB連自由都冇埋！因為隨住個肚愈嚟愈大，宮頸壓力也相對重咗，為咗可以令BB足月出世，Grace話生之前都要乖乖留喺屋企，大部分時間都要瞓低休養。
|
鍾意就快D Share啦！
|
|
|