戀殖情懷還是對當權者不滿，兩者均在香港平衡進行中，導演黃浩然執導的新作，再與邵仲衡合作，黃浩然個人立場並不特別戀殖，不過認為英國人有良心地賺香港人錢，更笑言：「以前啲嘢用100年都未壞。」而邵仲衡雖對現今政府不滿，不過正面呼籲大家不要灰心，認為雞蛋未必輸高牆。
撰文：黃曉妍
攝影：林德雄
導演黃浩然與邵仲衡在2014年合作電影《點對點》，教人慢活的走過香港一段段的歷史，集體回憶中又暗藏對時下政治、民生及警察的不滿，充滿世代之爭的反思。二人今次再合作的電影《逆向誘拐》，故事以一宗商業檔案網上被盜，引發出勒索案，帶出香港現時世代之爭，「老海鮮」以特權、財力騎劫成就，高高在上指罵新一代為「廢青」，年輕人的機會被拐帶。
黃浩然與邵仲衡接受本報專訪，對於近年越來越多人緬懷港英年代，邵仲衡認為：「唔到你唔懷念，我感覺最深刻就係我哋畀心機搵錢得就可以，有乜唔妥，佢哋（政府）幫我哋改正，遇到古靈精怪，就幫我哋掃走佢，根本唔使擔心，所以唔到你唔緬懷，不過身為中國人都希望好。」
黃浩然卻不認同：「其實我覺得冇分別，都係殖民地，只不過以前係英國殖民地，𠵱家變咗第二個國家嘅殖民地，都唔係住喺呢度嘅人話事，我唔會覺得英國佬特別好，如果佢哋係一個負責任嘅人，就唔會將香港掟低，我唔特別覺得緬懷英國。有啲人覺得要畀番英國管，我唔覺得有需要被任何人管。」
賺錢有良心
雖然不太認同英國處理香港的手法，不過黃浩然承認以前英國人有良心地賺香港人錢，他說：「你見到所有警車都係英國造，就算第一代地鐵都係英國造，好明顯佢哋喺度搞基建，但係掉轉頭睇，你睇吓大潭水塘，用咗100年，仲用得，佢係呃我哋錢，但係佢哋呃極，啲嘢都耐用啲，現在啲嘢，就好快現形。」
提到現今政府的諷刺地方，邵仲衡就覺得現在係由一班冇經驗的人領導：「我覺得係當權者嘅視野問題，佢哋冇國內商業社會經驗，但佢就制定一啲好影響行商嘅政策，搵佢去代表我哋同國內聯繫，根本佢哋都唔識，唔知啱定錯，用咗以前服侍舊老細嚟服侍呢班新老細。今次套戲亦都係想講呢樣嘢，你哋係咁諗箒，𠵱家新一代用高速互聯網，好容易去監察，一個人嘅底細可以人肉搜尋，有好多可能性。」
在戲中，有一句對白「呢個世界唔應該係咁」令邵仲衡覺得最有感受，他說：「我嘅理想世界係應該講理由及合理，但𠵱家走返轉頭，公唔公道先，我希望活喺一個講理由嘅社會，呢套戲都係講呢樣嘢，大家唔好灰心，係有好多可能性，雞蛋未必輸。」
世界進步緊
最後，黃浩然表示：「200年前，大部人都覺得黑人係低一等，𠵱家大家都知啦，奧巴馬都可以做美國總統；100年前，女人唔投得票，但100年之後，明啦，其實女人投票好正常，好合理，其實世界係點，其實係一直不斷進步緊，可惜香港近年停咗，同外地距離越遠。」
|
鍾意就快D Share啦！
|
|
|