「老爺車好似細路咁，你要去錫佢，好好地照顧佢，唔可以擺露天㗎，佢會發脾氣㗎。」即使古董車維修費動輒數十萬，香港仍不乏一眾車迷為之瘋狂。懷舊車老闆Paul愛車如命，不光是下雨，太晴朗的天氣下也不忍「愛車」馳騁公路。
香港的老爺車文化並不普及，不少人覺得這只是「成功人士」的娛樂產物。Paul坦言在香港依照自己興趣做生意很痛苦，除了因為古董車屬小眾消遣外，環境更是一大限制。「外國地方夠大，有自己車房，有啲車要整一年半載。地方不夠大既話，你接唔到其他生意，呢個月就食穀種啦。」
因為香港老爺車市場小，近年開始有內地客訂車。Paul坦言內地客「比香港人奇怪」，有很多「估佢唔到」的想法。「佢要求全車都係白色，內籠、地毯，乜都要白色，原來因為佢太太準備落香港生仔，佢知道香港救護車係白色。咁白色既車， 驟眼望似救護車，到時佢老婆喺入面，衝關生仔咪容易啲。」
玩古董車在緣分以外，更要落足心機，事關單單零件就令人大感頭痛。古董車過熱的機會比一般汽車大，電池漏電風險也不容忽視，隨時會在馬路上跪低。Paul需要24小時候命出門救車。「所以我做緊呢份工係唔正常㗎，凌晨兩點幾有客打電話嚟，話停喺隧道口，我要飛過去救。」原裝福士第二代麵包車，單維修都要三十萬，不包括牌照服務費用和運費。
雖然老爺車陰晴不定，但具有升值能力，每年有約20%至30%的升值空間。其實鍾意老爺車嗰班人，好多都「講心唔講金」。「當你一腳踏入去玩老爺車，講得難聽啲係死門關。你架車與別不同，你會好錫佢，冇得返轉頭㗎啦。」
編撰：張怡
錄影：林金展 林志謙
來源 source: http://nextplus.nextmedia.com
|
鍾意就快D Share啦！
|
|
|