當年8歲嘅李泳豪喺《義不容情》裏面展現神級喊功！
無綫翡翠台深宵時段播出劇集《義不容情》，喺劇入面飾演已故藝人藍潔瑛仔仔嘅李泳豪，當年只得八歲，但演技驚人、喊到力竭聲嘶，令唔少網友睇到「個心乸住」，被網友封為「元祖級童星」，大讚佢嘅演技無人能及。
李泳豪接受東網電話訪問，講番當時拍《義》劇嘅點滴，佢話藍潔瑛當佢好似仔咁錫：「佢係一個好好嘅前輩，好照顧我，有時又教我做戲。嗰陣好投入，冇話收工就變番同事，華哥（黃日華）又好照顧我。雖然拍完套劇同瑛姐（藍潔瑛）冇聯絡，但有時都會同華哥喺公司見到同合作。」
當拍劇係課外活動
問李泳豪點解可以喊得咁勁？佢話幕後功臣係媽媽施明：「媽媽由細到大都好錫我，我平時去拍戲佢都會帶住我，佢嗰陣教我入戲，叫我當瑛姐係佢，話如果佢死咗我會點，咁細路仔諗到自自然然就爆喊。（流傳當時係媽媽打你先喊得出？）呢點我要為佢哋澄清，真係冇咁嘅事，我嘅性格係就算你打我都唔會喊。」當時李泳豪拍《義》劇時就讀名校喇沙小學二年班，佢話記得當時一放學就去拍劇，但酬勞就唔清楚，因為當拍劇係課外活動：「嗰陣六點放學，八點就入到電視城，都係邊拍邊做功課。（成績兼顧到？）成績都幾好㗎，都係多謝媽媽，又教我做戲同功課。」
搶哥哥角色
而講到李泳豪另一套劇集《赤腳紳士》，飾演童年版呂方嘅佢，亦因為喊戲令唔少網友津津樂道，佢自爆當時同哥哥李泳漢爭角色：「哥哥得意過我好多，監製揀佢，我細個又有少少急才，問佢點解唔畀我Casting，佢話因為哥哥得意啲，我就話呂方隻眼細，我對眼又細，阿哥隻眼咁大，應該我適合啲！監製聽完就畀我Casting，結果揀咗我。」
來源 source: http://hk.on.cc
|
鍾意就快D Share啦！
|
|
|
