終於等到啦，終於等到佢季尾開倉講緊係張衞健（Dicky）嗰齣電視劇《大帥哥》，唔使再畀人笑係倉底貨！消息咁驚喜，成班劇組演員圍埋開Party慶祝，Dicky仲喺自己社交網開心Share首播日期。咁又係嘅，辛辛苦苦拍完，點知一波幾折，佢只係望齣劇順利出街啫，就同想有次暢快嘅小便一樣咁低要求，無奈屙吓又停吓，停吓又屙吓，唔屙又唔係喎，有心無力，惟有低頭輕嘆，男人們，你懂的。
全城有親 還我「大帥哥」
Dicky形同屙屹尿，好在有奶娘出手，嗰位咪係用18 面「人情牌」召佢返嚟拍劇嘅珍姐囉！唔係無綫親生仔嘅Dicky曾經喺記者會上講過，肯推晒啲人仔Job收友情價拍劇，全因要向睇住佢大、連佢溝過幾多條女都知嘅珍姐報恩，直情當係奶娘咁款！家陣養子齣劇出事，奶媽梗係要做嘢啦，上次珍姐喺記者會「一哭」，有可能今次就「二鬧」，如果搞到張衞健變「倉底健」，仲或者要「三上吊」添！ Dicky演韋小寶時成日吟「涼風有信，秋月無邊，虧我思嬌嘅情緒好比度日如年……」家陣應該改口：「奶娘守信，播出有期……」有得力幫手，佢肯定射程萬里，唔怕再見尿兜！
講真呢單「倉底風波」，大公司策略，行外人識條鐵咩？無綫人才輩出，幕後又有工作效率，儲埋好多深不見底嘅「倉底劇」又有咩出奇呢？《大帥哥》都係拍完年幾，冇喺說好的台慶黃金期播之嘛，因乜事啲人嘈住話「還我大帥哥來」呢？咪就係個個都同Dicky有親囉，佢好似親人咁隔住個電視Mon陪住大家成長，佢首歌仔「大笨象會跳舞……」仲有「咪當我係Robert」、「Yo ！使乜驚啊」、可以一口氣背出39個字唔喘氣就當你贏嘅「我係如來佛祖玉皇大帝觀音菩薩指定取西經特派使者花果山水簾洞美猴王齊天大聖孫悟空」，仲仲有「噼啪你個隆的咚呀」等經典對白，Hit到連廣管局都關注到，佢啲潮語真係「上達官場，下通細路」！
傾加人工脫貧畀人寸
講番《大帥哥》，有人話齣劇逃出倉底，但踩正聖誕同新年檔期播盞做炮灰，所謂「有麝自然香」，況且Dicky最強打逆境戰，單親嘅佢細細個就出嚟社會搵食，幫阿媽養大兩個細佬，多得張國榮幫拖話佢係表弟，帶挈佢多咗酒吧騷，之後贏咗新秀冠軍入埋無綫！可惜時運低，直至接拍《西遊記》扮齊天大聖先正式爆紅，諗住同無綫傾加人工脫貧，點知畀人寸：「如果你塊面冇毛，一毫子價值都冇。」男人窮可以冇錢、冇頭髮， 但絕對唔可以冇尊嚴！「型到跌渣」嘅佢剃光個頭，用條毛證明「冇毛唔使死」，離開無綫去內地、台灣重新出發，試過賺大錢，亦試過差啲破產，燶到要問只得1,000蚊身家嘅吳國敬借五舊水頂住先，但愈窮愈強嘅佢，離開無綫21年，身家成幾億， 原來光頭可以致富！「窮L」們，仲唔伸個頭出嚟引刀一快？
|
鍾意就快D Share啦！
|
|
|
