鄭嘉穎與陳凱琳（Grace）8月在峇里島舉行婚禮，結婚才三個月，兩人前晚同時在Ig宣佈造人成功，嘉穎撰文興奮地表示：「我們家庭將會有一個小寶貝！」陳凱琳同時報喜，嘉穎冧爆回應：「辛苦你啦老婆！」兩公婆隔空放閃。陳凱琳爸爸昨日接受傳媒訪問，亦開心地說：「生仔生女佢哋都冇所謂，平常心。」
現年49歲的鄭嘉穎與27歲的陳凱琳拍拖三年，今年8月在峇里島舉行婚禮，當時更一度傳出兩口子屬「雙喜臨門」，一對新人否認傳聞，不過不少有份出席婚禮的好友，都同聲希望這對新人早生貴子。嘉穎及Grace終於傳出好消息，在前晚感恩節，同於Ig宣佈已經造人成功！
鄭嘉穎於Ig以中文寫道：「感恩節，一個為了慶祝和感激我們所擁有的節日。在這個特別的日子裏，我和我太太想分享一份大禮物，就是我們家庭將會有一個小寶貝！雖然在成為父母的道路上仍然有很多東西要學習，但我們承諾，會盡最大的努力去照顧我們家庭的最新成員！」他同時上載一張與Grace開心相擁的照片，十分溫馨。Grace亦上載了同一張合照，留言內容跟嘉穎一樣，不過就換上了英文版本，老公嘉穎冧爆回應：「辛苦你啦老婆！」好友楊千嬅、馮盈盈、黃心穎及袁偉豪等亦有留言恭喜他們。
陳爸爸心情靚爆
大批記者昨日到Grace位於九龍塘的娘家等候，見到即將榮升外公的陳凱琳爸爸心情大靚，被問到Grace有幾多個月身孕時，陳爸爸未有回答，但仍笑笑說：「呢啲你問番佢啦。」再問他會否為Grace燉補品，陳爸爸說一切會由老婆負責，因為他不懂得煮，最多都是跟Grace兩夫婦去食飯。至於Grace及嘉穎初為人父母有否緊張？陳爸說話：「都係一般父母心情啦。生仔生女佢哋都冇所謂，平常心。」
沈卓盈、龔嘉欣、譚凱琪及Grace同屬「少婦聯盟」成員，對於好友有喜，沈卓盈昨日回覆傳媒查詢時表示：「我都係啱啱先知，已經恭喜咗哈哈，祝她生個肥肥白白又可愛嘅BB，三年抱三。」問到她想不想做BB契媽，沈卓盈說：「應該好多人爭住做。」至於另一成員龔嘉欣則表示：「我哋少婦聯盟個個都好戥佢同嘉穎開心，會一齊好好照顧佢。」而譚凱琪亦坦言對BB會錫到燶：「我知道時也非常開心，Grace是我們少婦聯盟第一位媽媽，我們幾個少婦一定會很寵她的寶寶。」
唐詩詠：錫到佢燶
其他圈中友人，亦紛紛向嘉穎及Grace送上祝福。《鐵馬尋橋》兄弟班的唐詩詠昨日回覆傳媒時說：「好戥好戥嘉穎開心，唔單止搵到一個同佢一生一世嘅人，𠵱家仲有埋個BB，我知呢個係佢最想擁有嘅嘢，好祝福大佬同大嫂。」唐詩詠表示這個BB是眾多好友之中首個新生命，所以她十分期待：「呢個BB嘅出現，我哋幾兄弟姊妹一定錫到佢燶，我哋咁多個第一個BB，期待佢出現。」而馬國明就認叻：「我梗係好戥佢開心，一早恭喜咗佢喇！」
採訪、攝影：徐錦池、孔志豪、陳杰、唐心悠
|
鍾意就快D Share啦！
|
|
|