經典劇《義不容情》最近重播，當年只得8歲嘅李泳豪得知阿媽藍潔瑛被判死刑後，喺雨中喊到死去活來，就算翻睇依然觸動好多觀眾嘅心，亦令人讚嘆：「原來李泳豪咁好戲架？」30年後再被認同，李泳豪都忍唔住喺facebook寫咗句：「很高興令觀眾重新認識我是一個演員。」點解咁感觸？因為佢喺大台多年，做嚟做去都係二打六，聽得最多嘅就係「乜你有拍呢套咩」、「見你只係過鏡」，令佢好難受。
講返當時李泳豪呢場雨中喊戲，睇到人心都酸埋。對於佢演技大爆發，外界多年嚟一直有傳，因為阿爸李家鼎同阿媽施明喺現場狠狠咁打，打到佢流馬尿。其實唔係，李泳豪澄清：「係我阿媽喺現場講故事我聽，教我將藍潔瑛代入做阿媽，要我諗下阿媽俾差人叔叔拉咗，所以我一諗就自然喊。當年8歲太細，當咗係就唔識抽離，搞到嗌cut後要爸爸媽媽（黃日華和藍潔瑛）安慰氹返我。」順帶一提，呢幕雨中喊戲，阿爸李家鼎有份攞水喉灑水扮落雨架。
據知當年監製韋家輝之所以搵李泳豪拍攝，係因為睇過佢演《赤腳紳士》同《誓不低頭》，知佢演得好。直到李泳豪喺美國讀完書返港，同梁烈唯等人一齊擔正電影《監獄風雲之少年犯》，一樣贏得唔少口碑，可惜因為院線同片商不和，搞到幾日就落畫，令李泳豪「出師不利」。
之後加入大台，但未受重用，曾經心有不憤諗過轉行，後來諗通咗，覺得打多份工無壞，於是繼續堅持。近年佢終於守得雲開，開日式燒肉餐廳，喺內地開飄移課程，林雅詩、楊明、馬國明都跟過佢學嘢，而家則主力喺內地搞汽車產品。
來源 source: http://nextplus.nextmedia.com
|
鍾意就快D Share啦！
|
|
|
