介紹日本嘅旅遊節目喺香港長做長有，不過好唔好睇，相信主持人比內容更重要，直接影響觀眾轉唔轉台！而近期兩個「日本達人」周奕瑋（Jarvis）及杜如風都喺無綫有獨腳騷，自然掀起一場追逐戰！
資歷
「後起之秀」Jarvis 2008年加入無綫，主要擔任娛樂主播，精通日語及「絕對見得人」嘅韓文令佢有唔少機會訪問多位紅星包括福山雅治、玄彬、李英愛、宋承憲等，亦曾主持多個綜藝節目如《3日2夜》客串《街坊廚神》，不過就一直未有個人節目。直到今年初，佢終於有處男作《周遊東京》，第二輯尋晚先播完，一年內拍兩輯就知幾受歡迎！
前輩級杜如風喺旅遊界打滾多年，十幾年前已經喺TVB有個人旅遊節目《流行東京》，最近呢幾年先後主持多輯《XX攻略》，三年間已拍咗7、8輯，而最近就係《昇龍道攻略》，最後一集就喺上星期日（11日）播完。
主持風格
Jarvis雖然已經35歲，但依家好有青春氣色，陽光兼鄰家男孩形象深得網民歡心，自然唔做作、有活力、有禮貌，最大賣點係佢經常同日本人交流，網民都大讚聽佢講日文好治愈，仲Feel到佢好尊重當地文化呀！
杜如風顛覆旅遊節目主持人「傳統」風格，形象嶄新，見到佢就諗起「癲喪」兩隻字，初期節目一出街已引起激烈討論！有網民覺得佢別樹一幟、生鬼有趣、夠晒真性情；相反亦被批評講嘢「一舊舊」唔知想點，而且喺節目極少講日文，「缺乏交流」呢樣嘢就爭啲喇！
節目內容
Jarvis主打貼地，唔只帶大家「食好西」，仲介紹好多港人甚少知道嘅「景點」！上一輯就有100円服飾放題、A5和牛拍賣等，今輯就有平價甜品outlet、生日優惠等，即係大家睇完都真係可以坐言起行嘅！而尋晚最後一集佢仲搵埋日本friend做嘉賓，睇住佢哋用日文溝通真係一大享受！
杜如風豁出去經常變妝已唔同造型示人，好似阿婆、歌舞伎咁，非常玩得！又會捐窿捐罅，不過網民就覺得大部分內相容都好離地，雖然會去食幾十蚊日本早餐，但佢經常介紹得個睇字嘅貴價名牌，隔住個Mon睇佢喪買喪食，唔係好實用咁囉！
講到尾兩人都有捧場客，不過佢哋嘅旅遊節目都啱啱播完，睇嚟大家都要餓吓先喇！
|
鍾意就快D Share啦！
|
|
|
