噚晚8點幾，馬鞍山錦英路利安巴士總站外，泊咗一架掛中港牌嘅寶馬私家車，阻礙巴士駛入站頭，當時寶馬入面冇人，巴士站長報警。警員其後聯絡到寶馬60歲姓劉車主，並要求出示駕駛執照，點知車主以為警員控告佢無牌駕駛，即使警員解釋都聽唔入耳，越講越激動：「抄牌我畀你抄，但你話無牌駕駛我就一定唔會畀身份證你！」令事件小事化大。
根據市民拍攝片段顯示，警員要求車主出示駕駛執照，帶鄉音嘅劉男表示冇帶，警員於是要求佢出示身份證，並準備票控。點知劉男突然情緒激動，高呼：「你唔准抄我無牌駕駛！」警員就解釋唔係告佢無牌駕駛，而係因為佢駕駛時冇帶駕駛執照而發告票。
不過，劉男依然故我：「駕駛執照我咪返去攞囉！身份證喺度，我依家係唔畀你呀！」事件擾攘近45分鐘，有街坊忍唔住斥責劉男，「呢度香港嚟㗎，要守法㗎！」街坊同時鬧劉男缺德，「救護車都過唔到呀！」亦有街坊不滿劉男日日擺架車喺度阻住啲邨民，話「有錢大晒呀？」
警方回覆指，噚晚有巴士站長及乘客報案，指一架私家車泊咗喺錦英路利安巴士總站外迴旋處外，阻礙巴士入站，警員到場了解時發現私家車上冇人，於是發出違例泊車告票。其後警員聯絡到車主，對方未能出示駕駛執照，於是再發出一張行車時未能出示有效行車證嘅告示，車主最後揸走架車。
你敢爆，我敢獎！ 立即WhatsApp《蘋果》24小時爆相爆片熱線或致電：63836568
|
鍾意就快D Share啦！
|
|
|