得閒有睇下電視嘅，相信都會認得大台綠葉演員黃栢文，尤其係早前《逆緣》龍震一角戲份頗重，大家應該有印象。早前《壹》撞見佢一家三口帶埋隻狗出嚟散步，咪睇佢依家輕鬆寫意呀，其實佢年輕時好坎坷架！
黃栢文嘅坎坷，由1984年擔任《公僕》男配角黑仔開始。當年李修賢憑《公僕》勇奪金像獎「最佳男主角」，而黃栢文就被提名金馬獎「最佳男配角」。不過，原來提名擺烏龍，令黃栢文慘遭「滑鐵盧」。佢話：「當年金馬獎我提名最佳男配角，臨去台灣好前多人恭喜我，話我已經拎咗半隻獎。點知頒獎禮前一個星期，台灣嗰邊忽然話提名錯誤，原來佢哋想提名嘅係《公僕》另一個男配角太保。當時被人捧到上天，又突然『嘭』一聲掉咗落嚟，我覺得好羞家。」
對一個只得26歲嘅年輕人嚟講，真係好大打擊，所以黃栢文開始意氣用事，發悔氣話以後都唔演戲喇，專注做幕後。點知直到執導第三部電影《雷霆掃穴》，佢嘅人生再迎嚟另一個難關──Cancer。
好彩發現得早，黃栢文嘅癌症好穩定，康復得八八九九，於是佢移民加拿大，話想「搵個清幽地方好好睇住個女成長」。黃栢文真係做得到呀！個女讀大學可以自立時，佢同老婆率先回流返港，而家個女大個喇，返埋嚟陪阿爸阿媽。
據知黃栢文呢類綠葉演員喺TVB好受歡迎，一嚟有經驗，二嚟可以帶新人，所以唔少監製都鍾意搵佢哋幫手，其中王心慰監製就最常搵黃栢文拍劇。不過聽聞佢經歷過起跌，一切以家庭樂為先，就好似呢日咁。至於拍劇，有得過下戲癮就滿足。
來源 source: http://nextplus.nextmedia.com
|
鍾意就快D Share啦！
|
|
|