講起藍潔瑛，好多人會連帶提及《義不容情》、《大時代》、「靚絕五台山」、「九龍女」。不過，呢啲全部都唔係小編所認識嘅藍潔瑛。
對於小編嚟講，藍潔瑛就係細個喺屋企，睇星期日午間影院播《西遊記月光寶盒》時，入面嗰個惡到死蜘蛛精春十三娘。
嗰時小編仲係個小學雞，只知道《月光寶盒》好好睇，笑得好開心，而春十三娘一啲都唔靚，因為佢現真身時極嘔心。
依家無咗以前嘅稚氣，再去諗返套戲，終於明白藍潔瑛點解「靚絕五台山」，亦幻想如果真係有「月光寶盒」，小編希望佢可以好似至尊寶咁，利用寶盒回到過去重新開始生活，哪怕好似《西遊記仙履奇緣》入面嘅豆腐西施，平平凡凡磨住豆腐等相公衣錦榮歸。簡單而快樂，總好過紅顏多薄命。
其實唔應該用「紅顏多薄命」，搞到好似因為「紅顏」，就理所當然要「薄命」，講唔通！明明係他人造成嘅傷害、後果，點解要用「紅顏薄命」嚟合理化咗藍潔瑛嘅苦呢？
來源 source: http://nextplus.nextmedia.com
|
鍾意就快D Share啦！
|
|
|
