藍潔瑛2015年最後在港公開接受訪問。
藍潔瑛近年少有公開露面，最近一次在港接受專訪要數到2015年，當時佢接受梁榮忠訪問，一頭黑色短髮化上淡妝嘅佢，精神非常唔錯。
最愛「玲姐」
喺訪談中，藍潔瑛大談過去拍劇及生活。佢坦言最鍾意嘅角色係1992年《大時代》嘅「玲姐」，而呢個角色藍潔瑛要演繹少女變中女嘅變化，係劇中靈魂人物，背景際遇坎坷。佢話以為做學生妹好易：「但睇番playback，原來好唔掂，輕視咗以為得，但過唔到自己嗰關！」講到最鍾意邊場戲時，佢就話匿埋後巷叫劉松仁救佢嗰場，仲點名大讚郭藹明及楊羚做得好添！
同家姐2年冇見
梁榮忠講到有傳佢因為太投入角色導致精神出現問題，藍潔瑛否認冇抽離唔到：「我何來搵一個方展博，方乜乜喺我身邊呀？」至於平時會搵邊個傾偈，佢就話成日打畀家姐，最close係佢，不過經常飛去電話留言！問到係咪冇辦法聯絡到，藍潔瑛就話：「我去搵佢囉！」不過兩人已經有2年以上冇見，對上一次見係藍潔瑛入醫院，但出嚟後就聯絡唔到！至於有冇其他朋友，藍潔瑛就猶豫咗陣：「都有㗎，唔多！Maggie、吳君如、羚羚（楊羚）。」
「最緊要健康」
講到生活費，藍潔瑛大方承認要攞綜援：「仲有一個講國語嘅（人）每個月畀幾千蚊我。」咁有咩幫到佢呢？佢話：「我真係唔知喎！錄吓歌畀我聽吓囉！」如果可以避開晒傳媒，會唔會想復出？藍潔瑛好肯定話：「會，點會唔會呀？做演員啦，唔通叫我寫稿呀！」言談間藍潔瑛思路清晰，仲識得講笑添！不過佢就冇咩特別角色想試。最後，佢就話最緊要健康，內心喜悅緊要過開心。
來源 source: http://hk.on.cc
|
鍾意就快D Share啦！
|
|
|
