大台新劇《救妻同學會》昨晚（11月25日）首播。本來好多觀眾，特別係年輕一輩都好期待，話晒青春愛情劇喎，俊男美女啱晒後生仔女口味啦。點知，第一集都未播完，唔少人已經話要棄劇，話睇唔落去，更列出3大負評位。
首先，貨不對辦。套劇標榜青春，以年輕人為收視對象，但主角好多都係80後，平均年齡近30歲，學網民話齋：「啲選角年紀咁大，老過班觀眾，仲好意思話係青春劇？《愛回家》都青春過呢套。」誠言，搵班30歲講潮語就以為好青春？仲要咁嘅打扮紮孖辮？其實成件事更加尷尬。
其次，色調問題。《救妻》嘅畫面偏光而且對比度低，搞到人物、背景唔分明，好似融為一體咁。加上有種粉紅粉紅嘅感覺，睇落好唔自然、好唔舒服，難怪網民會問：「調色條友盲架？」或者只係想遮遮歲月痕跡，睇落青春啲啫。
第三，亦係套劇最失敗嘅地方，就係講故事能力極差。加入平行時空元素，同時講述現在同過去兩條故事線唔係唔得，但都唔好無啦啦話跳就跳穿插得咁快吖，搞到成個劇情散收收，觀眾又睇到好亂好混淆，最後得出同一個疑問：「究竟表達緊啲乜？」
網民總結，第一，呢套青春劇一啲都唔青春；第二，劇情睇到觀眾一嚿雲；第三，TVB都係拍返啲師奶劇算啦。
補充一點，有鑑於觀眾對第一集已經負評如潮，黃美棋BB喺社交網站發文：「希望大家可以俾多少少耐性，繼續支持!因為之後嘅每一集、無一個情節，都可以解開你哋嘅疑問。」咁大家會堅決棄劇，還是拭目以待？
來源 source: http://nextplus.nextmedia.com
|
鍾意就快D Share啦！
|
|
|
