「三年又三年……」這句不但是電影《無間道》中的經典對白，更是無數卧底警心聲。經歷一年卧底生涯的阿成感受至深，潛行黑白道之間，見盡腥風血雨、嚐盡人性黑暗面，他坦言曾經埋怨過、動搖過、迷失過，內心被恐懼和掙扎佔領，但憑着「我係一個警察」的信念堅持走下去。他這次揭開卧底的神秘面紗，全因早前「佐敦之虎」案中，因卧底警被法官指證供不可信，令9被告全脫罪，案中關鍵的卧底警受盡千夫所指，不過在阿成眼中：「卧底係無名英雄！」
記者：黃學潤 郭美華 張 軍
三年前8月的一個深夜，阿成手機突然響起，聽筒傳來大佬「吹雞」，叫他立即去旺角砵蘭街追斬一名仇家，阿成扮作鎮定爽快回應「好」，並隨即動身「擸架生」，但事實是，他手心冒汗、內心極之掙扎，「呢次真係驚，因為隨時會斬死人，但我唔可以唔去，因為唔知大佬今次真係想尋仇，定係想測試我！」
當晚的旺角黑夜，人煙特別稀少，阿成與一班兄弟各手持牛肉刀一字排開，一場血腥廝殺如箭在弘；當仇家一蒲頭，即有人大喝一聲：「衝上去！」刀光劍影一剎，阿成一度猶豫，故意放慢腳步，「如果真係要斬落去，我衝力冇咁大嘅話，斬都冇咁傷！」幸而，仇家在分叉路逃脫，阿成才鬆一口氣。
回想這次「劈友」經歷，作為一個對未來滿腹抱負的警員來說，實在難以說服自己，一度久久未能平伏心情。問阿成有沒有後悔踏上卧底之路，他沉默了好一陣子，「因為我係警察，有一個使命……不過如果係𠵱家，我未必會做，因為承受嘅壓力唔簡單。」
眼前的阿成，外表斯斯文文，沒有染金毛、沒有耳環加粗頸鏈、沒有粗口爛舌，身上就連一個小小的紋身也沒有，根本沒半點「古惑仔味」，但他總是避開油尖旺這些「舊地盤」，每次與記者見面，也不斷轉地點，深怕被人跟蹤似的，但說穿了，他更像是怕被古惑仔尋仇。「喺嗰一年，我對佢哋講嘅每一句話，冇乜邊句係真，令我覺得好唔舒服。」要做到一個成功的卧底，就要做個「雙面人」，但這點令阿成不斷出現「腦交戰」，感覺最為難、最痛苦。
這段汗水淚水血水交織的卧底生涯，就在阿成學堂畢業不久開始。當日的情景儼如卧底電影情節，阿成警服都未穿暖就被「革扯」，隨即被安排混入一個當年被警方銳意打擊的社團大佬身邊。就在那一刻起，其警察委任證、警察部電腦紀錄及原本身份證資料都一一消失，變成一個「古惑仔」。
為了投入卧底角色，阿成花好幾個月熟讀大佬背景、喜好，連對方走路時齖齖齰齰的姿態、說話語氣，也用了一個月模仿。「最初都係行行企企咋，但我要喺呢段時間了解大佬身邊有乜嘢人、佢哋負責乜嘢、講嘢係咪可靠，因為呢啲隨時係情報之一。」同時，阿成另一重要任務是盡快領功，取得大佬的信任。
每名卧底均由一名沙展職級的操控員（Handler）負責，他們會為卧底製造「領功機會」，「例如查牌，（操控員）會預先提示我，我再藉口叫大佬小心，令佢覺得我好機警。」經過多次「好表現」，阿成火速上位，僅花了約4個月就成為其中一名頭目的左右手。
徘徊在黑白邊緣，阿成每天反問自己：「我仲係咪警察？」令他感受最深的一次，是在街頭「晒馬劈友」，被反黑拉到帶返警局，「嗰次俾反黑打咗幾鎚都預咗㗎喇，打得都好甘吓，但我最痛嘅唔係身，而係個心，如果我係古惑仔，我俾你打，我心甘命抵，但事實大家都係警察、自己人，你做緊嘢時，我都係㗎，但我有口難言，唔講得。」獲釋後，他首次躲在安全屋流下男兒淚，「仲問自己點解要做呢啲嘢，到底我仲係咪警察？」這次委屈更一度令他萌生歪念，更想過若要做卧底超過一年，便會辭職，「日日見到佢哋（古惑仔）嘻嘻哈哈，我做乜仲要做卧底，做乜要俾人打？做乜要咁辛苦？」
每天返安全屋寫「卧底日記」，才讓阿成重拾「我係一個警察」的實在感。因為他需詳列大佬行蹤、接觸過的人等等，也要定期與操控員在安全屋見面，但有次他終於問操控員：「日子真係好難捱，我仲要捱幾耐，會唔會好似電影咁三年又三年，佢每次只係話，好快做完㗎喇，到時可以做返自己㗎喇。」
幸而剛好一年時間，主管認為時機成熟決定「收網」，最終「大佬」亦被判有罪，阿成得以「重生」回復警察身份，「攞返委任證一刻，我先覺得……我真係一個警察，我唔係古惑仔！」
你敢爆，我敢獎！ 立即WhatsApp《蘋果》24小時爆相爆片熱線或致電：63836568
|
鍾意就快D Share啦！
|
|
|