劉德華和太太朱麗倩結婚十年，愛女劉向蕙亦6歲，這些年來華仔一直保護妻女以免曝光，但在經歷去年初墮馬意外後，前晚華仔再踏上紅館舞台，除罕有地讓妻女陪同父母安坐台下睇足全場外，還公開女兒畫作共賞。作為傷癒復出的首個演唱會，華仔被吊上半空獻唱時也直言： 「淆淆哋。」
劉德華20場「My Love Andy Lau 劉德華 World Tour」跨年演唱會前晚在紅館揭開序幕，華仔妻女睇足全場，華仔唱出《笨小孩》、《謝謝你的愛》及《獨自去偷歡》等歌，而演出期間，天幕投影了愛女劉向蕙所畫和父母手拖手的畫作。傷癒後再踏上舞台的華仔狀態大勇，跟性感舞蹈員共舞，又被吊上半空唱《如果有一天》，繞場跟山頂位的觀眾拉近距離。
華仔說：「我原本上年開演唱會，計劃得好好，諗住上年個女讀K3輕鬆啲，今年小一就煩啲，所以我擔心啲、好大壓力。今日我帶住好緊張嘅心情嚟到呢度，見到好輕鬆嘅觀眾，令我所有緊張同壓力，喺頭先完全解放。」唱出多首快歌後，華仔再說：「今次好多人擔心我體能上可能辛苦啲，但我辛苦得好開心。」說罷即有fans大叫：「從頭嚟過！」華仔即頗大反應說：「從頭嚟過？你係咪想我死呀？係咪儍㗎？」畢竟久休復出，華仔唱出一連串快歌包括《我恨我痴心》、《末世天使》等medley後不禁說：「你哋攰唔攰呀？不如唞唞先啦。」隨之又感性地說：「好多謝過往日子，無論健康唔健康、開心唔開心都有你哋支持。」
演唱會結束後，華仔在後台受訪，評價整體表現時說：「有啲興奮，有啲緊張又有啲攰，我覺得台下分數比我仲高，啲觀眾真係不得了。」提到囡囡看到手舞足蹈，華仔甜笑反問：「係咪呀？第一次，佢係第一次睇演唱會。」更笑指天幕投影的畫作是囡囡的功課。一向保護家人私穩的他今次公讓妻女曝光，華仔直言一切是他安排：「我叫㗎嘛！我係一家之主，梗係我叫。」至於妻女之後會否繼續捧場，華仔表示會由她們決定，不過他笑言擔心囡囡看完一場後不想再看。
談到他為照顧山頂位的觀眾，站上僅容納一人的吊台繞場，時高時低，感覺有如在觀眾頭頂飛過，華仔直言：「其實都安全，視覺係好啲，我都淆淆哋，不過體力還好，仲可以撐落去。」但唱medley時，因跳舞時間較長，他坦承感覺越跳越重。而一向照顧歌迷的他，竟然取消握手環節，華仔解釋因為有陰影：「醫生話我最驚突然chok親，就算坐車我都叫司機唔好突然剎車。見我成日望地（演出時），因為spotlight太光，遮住我睇唔到，我都要好小心。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|