一早發「預警」今年一定生B：「This is my goal！」嘅張栢芝被爆生咗第三胎，全城問號爸爸去哪兒？栢芝保持緘默冇Say No，經理人又唔否認，我Nuts哥想同栢芝講句：「我真係恭喜你！」離婚七年，呢個「七年之癢」幫佢擺脫鋒菲嘅陰影，唔使被迫飾演怨婦，呢個BB幫栢芝Refresh人生，得以重生，一天都光晒，今次仲唔係「借種」轉運？
栢芝一直被指對前夫未忘情，忍到舊年終於大反擊，講明對霆鋒冇愛，對王菲冇恨，由頭到尾都係祝福鋒菲戀，佢仲話：「我冇放唔低，我好快樂，活得好精彩！」但係講完等於冇講，始終改變唔到外間嘅諗法。今次直接跳Step做未婚媽媽，竟然有唔少口痕友喺網上大發偉論，話因為識咗個有錢佬、生B可以分多份身家、又話家族關係圖複雜過港鐵路線圖等。我睇到𢱑晒頭，話晒係喜事，唔恭喜都算，點解要網絡攻擊？生多個，話佢為錢；唔生BB唔拍拖，就講到佢好似怨婦咁賴死唔走，個龍門咁搬法，即係講晒
母愛爆棚湊埋細佬
係咪守生寡獨守空幃、眠乾睡濕湊大細路，就係好媽媽？前夫都可以再搵另一半，點解佢唔可以再生B？話時話，科學咁昌明，以佢講得出做得到嘅性格，去借種人工受孕嚟完成目標，真係唔出奇！就算係同傳聞中65歲新加坡富商生B，都叫做妙手回春，大地回甘，算係人間美事呀！
經歷過四次流產、作為兩位小朋友嘅媽媽，由未婚、結婚到離婚，一直都話最鍾意最享受做媽媽，仲話最好不停生仔，栢芝變栢「豬」，有大有細，唔怪得當年佢話要幫謝家生夠五個佢出名母愛氾濫，自細照顧兩個細佬豪龍同柏文，到大個咗，衣食住行買車買樓一條龍全包！淨係睇佢呢七年照顧一對囝囝Lucas同Quintus，唔少媽媽都話要畀Like，讚佢係Superwoman，一個女人帶兩個細路去新加坡，冇工人、冇司機、冇補習一腳踢，仲未計要陪埋食玩瞓，全天候廿四小時全力照顧，犧牲唔少吸金搵錢嘅機會。
囝囝貼地 家教無敵
識栢芝嘅媽媽級朋友，話估唔到佢教仔有方，親眼目擊呢對小兄弟，就算買個麵包都同店員唔該前唔該後，超有禮貌，仲不時去做義工探訪，栢芝話要畀囝囝貼地多啲。係咪教得好、同媽媽嘅關係有幾Close，小朋友係真情流露，扮都扮唔到。莫講話唔少網友捕獲三母子去到邊都攬埋一舊，最記得栢芝Post過一張相，係Lucas見栢芝瞓着，主動搵個公仔畀佢墊住個頭都未夠，仲要幫佢撩埋牙！如果栢芝冇對個仔咁做過，Lucas都唔識做番出嚟。
曾經愛玩愛蒲、食煙飲酒、我行我素嘅栢芝一定唔係大家心目中嘅乖女仔，但講盡責嘅好媽媽， 佢一定當之無愧，無論今次係生女定仔，生父係嚟自新加坡定摩洛哥，至少佢勇於踏出一步，實踐夢想，為自己爭取另一種幸褔。
|
鍾意就快D Share啦！
|
|
|
