仲有唔夠一個月就踏入2019年。
周秀娜總結今年成績表，佢都好滿意。佢今年初憑電影《29+1》提名「第37屆香港電影金像獎」嘅最佳女主角，雖然最後落敗，但佢覺得有提名已係好大鼓勵。娜姐即將又有電影《葉問外傳：張天志》上映，佢今年工作好忙，忙得嚟又好開心：「希望來年都可以繼續keep住，拍到想拍嘅戲，又演到一啲新角色。」工作接踵而嚟，荷包係咪都賺到脹卜卜？姐娜笑瞇瞇話：「比舊年賺多咗少少，每一年係會有增長。」娜姐見賺多咗，決定買樣禮物獎勵自己，佢揀咗一條款式同佢好襯嘅鑽鏈，因為吊墜係一個半圓型，驟眼望去似一個C字，中間吊有一粒閃令令鑽石，款式別緻。「以前我係會買手袋獎勵自己，0依家大個咗就買唔同嘅嘢，想保值啲，買啲細細哋飾物，我鍾意簡單易襯啲嘅款式，當係2018年畀自己嘅小獎勵。」
問到娜姐今年嘅聖誕願望？佢衝口而出：「我其實幾想拍拖。」娜姐近年專注工作，未暇去發展戀情，dry爆多年嘅佢都想有愛情滋潤一下。唔知擇偶條件有乜嘢要求？娜姐就話：「我想有啲唔同嘅生活，dry爆大家不嬲都知，想有一個人分享我開心同唔開心，兩個人可以傾到偈同談心。」可要求對方係高富帥？娜姐話：「我冇限死一個框框，唔使富二代，啱傾就得，肯聽我講嘢，如果係靚仔咪當Bonus，對方乾淨順眼啦，我會睇第一印象，要企理，大家感覺會舒服，矮過我...睇感覺行先。」娜姐公開求偶，此言一出，相信好多人想今個聖誕約佢，娜姐就話：「聖誕節我唔喺香港，會去旅行，每年聖誕我會放自己一個長假期，去叉電唞吓，假期充完電，又係新一年新開始。」
娜姐期待2019年，事業愛情都再大豐收，佢期望明年喺電影上可以再遇到好角色，「今年我都試咗唔同類型角色，又拍過宮廷劇。出年想試吓拍武俠片，希望人生中可以拍一部金庸作品。」係咪都想演小龍女？娜姐話：「我未必做得到，就唔好破壞小龍女對大家嘅印象。」過往唔少女藝人都演過小龍女，娜姐話每個揀得出嚟都係適合。其實金庸小說《鹿鼎記》中韋小寶咁多個老婆，好似好啱娜姐演？佢都有興趣：「呢個古仔仲開的話都想演，但電影篇幅較細，可以的話我想演吓反派，唔想成日都淨係扮好人。金庸小說，我最鍾意《笑傲江湖》，當年細個追晒劇集先睇原著。」
撰文：劉敏
珠寶提供：周生生
服裝提供：連卡佛
場地提供：Santé Wine Bar
| 周秀娜自嘲dry爆，期待有愛情滋潤。（攝錄：郭賢興、廖達燊） | | |
| | | |
|
鍾意就快D Share啦！
|
|
|
