張衞健（Dicky）在劇集《大帥哥》中的演出回響極大，由之前的「倉底劇」，現變成網民力撐的「話題劇」，「張衞健式」演繹被網民指他有料跟無綫一眾親生仔爭視帝 ！不過22年前，有傳憑「孫悟空」一角而爆紅的他，因要求無綫加人工，結果被寸「你冇毛冇價值㗎」，令他一氣之下離開娘家！
日前Dicky接受專訪時，他表示要為無綫澄清：「其實嗰位係電影界嘅前輩，佢約我去酒店coffee shop傾電影嘢，個角色唔使黐毛嘅，不過原來有啲人為咗壓價可以去到咁盡，嗰句說話真係hurt到爆，嬲到立即埋單走人！」他指當時的心情不能用hurt來形容，簡直是扼殺一個正搏殺中的年青人，又說：「嗰陣我真係有諗，我唔係孫悟空就唔得嘅呢？咁死啦，我嗰時都係30出頭咋！」
學識原諒同忘記
Dicky婉拒透露對方名字，但被打沉時是堅嬲：「我諗起「F』字頭嘅英文。（粗口？）係Forgive（原諒）同Forgot（忘記）呀，想忘記咗件事，但個腦唔係要Forgot就Forgot到，不過當我Forgive咗佢，我就delete咗件事，就算見番嗰個人，都唔會尷尬。」至於一直光頭要證明「張衞健冇毛都得」？他坦言：「有關事又唔關事，嗰時咁啱要剃頭拍清裝，反正我係靠實力…再加少少靚仔。」
Dicky「冇毛有運行」，光頭唯一缺點是令他飽受「乾煎」之痛，在佛山拍劇時，於40度高溫下日日暴曬長達三個月，他呻：「我冇毛保護頭皮，直曬落嚟喎，大佬，曬到瘟瘟燉燉，連兩句對白都講唔到，所有energy都攞晒嚟對抗天氣，而唔係放喺正常嘅運作度。」
天生辛苦命
問到今次捱義氣回無綫拍劇，豈不是「攞苦嚟呻」？擁有幾億身家的他，卻自嘲「賤命」，他說：「So far，我未試過拍一部好舒服嘅劇會爆，每次畀人話係代表作之中嘅代表作嘅，我都係拍得好辛苦，所以喺我嘅概念裏面，天生一條辛苦命，唔辛苦點得世間財？」
談及在劇中的「張衞健式搞笑」，他透露開拍前曾考慮過以全新演繹方式，用非「張衞健」姿態去演「大帥哥」，他問：「我有諗過觀眾想睇我邊樣嘢呢？定想睇張衞健，我又唔畀佢睇好唔好呢？」正諗到「頭髮冇得甩」時，坊間一句「還我大帥哥」令他想通了，他謂：「令我覺得唔做張衞健，啲觀眾又使乜睇我，扮梁朝偉拍大帥哥呀？咁我睇梁朝偉呢，唔使睇我？」
|
鍾意就快D Share啦！
|
|
|
