現年67歲的洪金寶，9歲當童星，31歲憑《提防小手》首奪香港金像獎影帝，之後開德寶電影公司，七、八十年代在香港影壇叱吒風雲，開拍的《福星》電影系列票房大收。在電影王國中，洪金寶是「大哥大」，出名脾氣臭又爛口，不過面對太太高麗虹，他坦言要「百忍成金」。近年兩個孫兒也是死穴，二十四孝爺爺戮力收火，無非為家和萬事興。
撰文︰祖李
攝影︰郭賢興
相關新聞：同李小龍起誤會比試
洪金寶在片場是揸弗人，不過面對老婆高麗虹及兩名孫兒，他卻甘願學溫柔，讓家庭變得更和諧。日前他接受《蘋果》專訪時，大談夫妻之道最重要是包容，他說︰「太太同我都係一個字，忍囉！做夫妻係要咁，我好多衰嘢佢要忍，相對地，我明明唔鍾意都要忍佢，因為人冇十全十美，有時又要諗吓佢點解咁做，都係為我好啫，咁我咪『骨』聲吞咗佢，嗰刻係好㷫，但諗深一層都係自己唔啱。」洪金寶更自認臭脾氣︰「我有太多缺點，脾氣臭又鍾意講粗口，又鍾意鬧人，咁我太太咪忍囉。個個麻甩佬追你嗰陣，實就晒你，呢樣我都有教個仔，做夫妻包容好重要，唔係單睇兩個人，要睇對家庭嘅影響。」
| | | |
後悔鬧孫仔
在娛樂圈打滾四十多年，洪金寶緋聞不算多，傳得最盛的是02年拍內地電視劇《特警飛龍》與范冰冰結緣。當年洪金寶被傳媒追問兩人緋聞時，採取避談態度，之前兒子洪天明也曾因為緋聞，令新抱周家蔚打翻醋埕，問可有教兒子兩招，慧黠的他咪咪嘴笑說︰「緋聞？我有㗎！不過冚得好。個個都講㗎，又話呢個又話嗰個。總之醒目啲咪得囉，唔好暴露任何破綻俾人捉到，咁咪得囉！哈哈哈。」果然薑是老的辣！
洪金寶是二十四孝爺爺，不時弄孫為樂，很想教兩個孫仔功夫的他，卻怕自己脾氣大嚇親孫仔，現在先努力學習收斂。而提起兩個孫仔，其嘴角不自覺向上翹︰「我脾氣差，成日覺得喝啲孫唔啱，好似孫仔瞓瞓吓喊，搞到我𤷪，半夜三更喊完又喊，我就大喝︰『瞓覺！』之後孫仔話︰『我以後唔嚟！我好驚！爺爺鬧我。』唉，以後我唔敢再咁惡，費事佢以後唔嚟。」
相關新聞：睇唔明林敏驄劇本
藤條打仔女
現在為孫兒收火，但當年洪金寶是嚴父，子女犯錯他會藤條侍候︰「佢哋細個嗰陣，三個都喺加拿大讀書，我喺香港搵食、搏命，大家溝通上都有問題。我會打㗎！打佢哋屁股，打嗰陣郁一郁，唔算，再打，但打之前我會先問佢︰『你係咪犯錯？』不過我思想好開放，到佢哋十幾歲，同仔女相處就似朋友。」
教子女的方式，洪金寶頗受師傅于占元影響，認為教小朋友一定要嚴，嚴厲才能成大器，所以「七小福」除了他，師弟成龍、元彪個個在影壇都獨當一面，他說「七小福」同甘共苦學藝七年，令他畢生難忘。眾師兄弟中，他逃學最多，經常被于占元毒打。當年每天練功由清晨7時到深夜11時，身心疲累，但卻練得一身好武功︰「教功夫係要惡、打到飛起至得，我嗰陣都成日逃學，因為太痛苦，師傅打親都好金。我哋師兄弟踎一個竇口七年，感情好深厚，我哋呢啲係日夜陪伴你喎。就因為太痛苦，當年大仔天明愛功夫，我都冇教，唔忍心佢辛苦。」
期待父子班
洪金寶有三子一女，全是與第一任中、韓混血兒妻子曹恩玉所生，三個兒子天明、天祥及天照都投身演藝界，天祥夾band兼做武指，不過三人中，以天明身手最好，洪金寶坦言希望有日可以父子班合作。他一臉自豪說︰「唔知係咪遺傳因子，天明身手好好，好多高難度動作佢都做到，如果當初親自教佢，可以提點佢好多嘢。但當時我拍戲太忙，佢又讀緊書，我冇諗過畀佢入行。我係過來人，練功夫好辛苦，又會受傷，唔想佢捱。後來佢想入行，我又離開咗電影圈好耐，所以一直都冇合作。𠵱家有諗，我三個仔都唔錯，父子班合作有啲噱頭，我希望有日會實現。」洪金寶坦言拍動作片太苦︰「成日都受傷，最嚴重除咗膝蓋，就係尾龍骨。」問到斷手斷腳次數，他說：「太多嘞！我隻手斷過三次，隻腳甩骹七次，好在甩唔晒仲黐住。冇計，搵食嘛。」
|
鍾意就快D Share啦！
|
|
|