一年一度嘅《國際中華小姐競選》又嚟喇！比賽將於3月2日（星期六） 晚上舉行，嚟自五湖四海嘅19位佳麗語言不一，為咗加強說話能力，歐陽偉豪（Ben Sir）就話要同一班佳麗特訓，搞咗一個「國際母語日」教吓大家講廣東話！Ben Sir仲笑言要考吓佳麗們嘅能力，如果唔得就由Ben Sir幫佢哋餵哺母語，認真抵死！
一開波，Ben Sir就邀請嚟自曼谷嘅鄭子怡出場，點知全場靜止冇反應，場面尷尬！原來鄭子怡聽唔明Ben Sir講乜，出到嚟就用英文問：「我喺邊？我要做啲乜？」搞到Ben Sir即時O晒嘴！到鄭子怡自我介紹時，竟將「新聞主播」講咗做「新聞豬播」，之後仲要靠身後其他佳麗提水添！另外，嚟自芝加哥嘅「段薏丹」就連自己個名都搞錯，自信十足咁叫自己做「段一丹」，令Ben Sir都表示驚嘆！而嚟自加拿大嘅胡楠青更加係災難性場面，事關佢同Ben Sir全程雞同鴨講之餘，就連節目組都無法翻譯字幕！
介紹完一輪後，Ben Sir就由基本功開始教起，先教佳麗們粵語六聲調。其中有佳麗誤將「三碗細牛腩麵」講成「三碗犀牛腩麵」，而嚟自溫哥華嘅林昀佳亦將「蝦仁炒蛋」講成「黑人炒蛋」，十分搞笑！不過講到最爆嘅係， Ben Sir之後轉用「7」、「9」字變聲，搞到佳麗們集體爆粗，非常爆笑！
來源 source: http://hk.on.cc
|
鍾意就快D Share啦！
|
|
|