曾經俾網民發現，買飯盒俾執紙皮婆婆食嘅馬蹄露，近日又俾大埔街坊發現佢喺一間茶餐廳幫手，不過唔係做伙記，而係做義工。
大埔呢間茶餐廳，每星期都送五十個飯盒俾班長者，呢日多咗義工，就係馬蹄露。壹仔去到，發現排隊嘅長者超晒額，過百個老友記喺度等候，幫手派飯嘅馬蹄露好落力。佢做義工次餘，仲掏埋荷包買湯圓送俾公公婆婆，加埋佢把咀，氹到班長者鬼咁開心。
茶餐廳老闆同壹仔講，馬蹄露係呢度嘅街坊。「佢第一次嚟食嘢，咁我問佢有冇興趣，聽日嚟參予派飯，佢就一口答應話ok，所以今日就嚟咗！」
有顆善心嘅馬蹄露，本身都俾病痛纏身，除多年嚟受類風濕關節炎所困，13年佢喺內地拍大台劇《巾幗3》時，坐場務駕駛嘅電單車途中失事墮坑，搞到由頸椎到盆骨都歪晒。最慘係腦受震盪，影響平衡力，開工拍劇要搵嘢扶先企穩得。仲因為咁，曾經有創傷後遺，要排街症睇精神科。不過佢冇因此自怨自艾，反而一有時間同精神，就去幫人。
派飯當日，壹仔捉住出錢又出力嘅馬蹄露傾咗兩句。佢話:「我尋日首次嚟呢間餐廳食嘢，我見到佢哋寫住逢星期二及五有派飯，老闆問我有冇興趣，我話好呀！呢度都好多善長人翁，都預備咗一啲利是同水果，蒸餾水等，派俾老人家開心吓！原本我都封利是，不過佢哋建議留待下星期五先派，我話好」
來源 source: http://nextplus.nextmedia.com
|
鍾意就快D Share啦！
|
|
|