邵氏影星鄭佩佩女兒原子鏸，昨日與摩洛哥男友Mehdi舉行婚禮，忍不住連環咀放閃及發表愛的宣言，新娘感動眼濕濕，自嘲年紀大心急生B，有意生夠一隊足球隊，將不設防造人，又冧爆給予老公滿分。而榮升外母的鄭佩佩，則大讚女婿為人細心，同樣給予滿分！
藝人原子鏸（Marsha）昨日下嫁Mehdi，於深灣遊艇會舉行婚禮，筵開12席宴親朋，新人以筷子作為回禮禮物，圈中好友朱茵、陳法蓉、蔡少芬及張晉等到賀，婚禮開始時，穿上低胸拖尾婚紗的Marsha手翹父親進場，全程笑容滿面，及後新人交換戒指，禮成後應傳媒要求咀完又咀。
受訪前，二人一直咀不停，當中Marsha更主動獻上肉嘴，非常甜蜜！升呢人妻的她全程眼濕濕，問到會到哪裏度蜜月？她以英文着老公不要告訴傳媒。至於儀式上可有愛的宣言？她說：「我要同老公屋企人講法文，事前都練咗好耐，老公係我最愛嘅人、王子、朋友同知己。」Mehdi則說：「我會永遠愛佢同保護佢，令佢好溫暖，永遠都會同佢一齊，每一日都會錫佢，好似今日咁。」更指與Marsha相識至今已893日。受老公甜言感動的Marsha笑指幸好老公先發言，雖然當下非常感動，但要保持情緒，故未有表現得太激動，不諱言若果以英文講話，相信自己未能說下去。
戒指係假都冇問題
提到生小朋友，40歲的Marsha承諾會實行，自嘲年紀大，所以很心急：「生得幾多得幾多！」是否要生夠一隊足球隊？Mehdi大表贊成：「OK!Good!」首次叫「老公」的Marsha笑言感覺奇怪，更即席教Mehdi講「老公、老婆」。問到婚後可會隨老公返摩洛哥居住？她說：「應該會留喺香港，因為佢都嚟咗香港12年。（老公值幾多分？）滿分！佢係第一個男人畀我做番自己。（戒指有幾多卡？）問都冇問，我唔理，就算係假都冇問題，不過佢話我知戒指係真嘅。」更指會與老公在婚禮上表演跳舞、唱歌及彈結他，屆時會換上舞衣及旗袍，實行以索爆新娘Look示人。
新外母唔急抱孫
升任新外母的佩佩以棗紅色旗袍出現，比一對新人還要早到場，她笑不攏嘴大談心情：「好開心，終於有人幫我照顧佢，我以後唔使負責任。（係咪跟足中式傳統儀式？）佢哋呢個婚禮有中、有西，又有摩洛哥，比較複雜，斟茶儀式就尋日斟咗，我冇乜嘢要幫手，都係坐喺度參加婚禮。」問到送甚麼給新人？她笑言送了個女給女婿，並囑咐兩人：「要互相照顧，唔只係個男仔照顧我個女，我個女都要照顧番個男仔。（畀幾多分女婿？）依家一百分滿分，將來唔知，不過女婿好細心，好照顧到身邊人，連我呢個外母都好好照顧。（心唔心急抱孫？）我冇！佢老竇（心急），我唔會催，唔抱唔抱，我都抱唔郁」
更多新聞，請瀏覽東方日報網頁：
https://orientaldaily.on.cc/
|
鍾意就快D Share啦！
|
|
|