96年四料港姐冠軍、現年41歲的李珊珊近年深居簡出，一直被傳患有重病。神隱七年的珊珊昨晚應好友東華主席王賢誌的邀請，出席慈善活動，在台上與癌症病人分享經歷，她慨嘆香港醫療系統爆煲，「公院似戰地、私院冇床位。」珊珊更直言抗病路崎嶇：「精神肉體係痛苦嘅。」
相關新聞：【蘋聞重溫】擁36E身材成焦點
神隱七年的李珊珊昨晚露真身，應東華主席王賢誌邀請，以神秘嘉賓身份，到灣仔伊館出席他任內最後一個大型慈善音樂會《誌友共聚》，打頭陣現身的珊珊，在台上與癌症病人分享自身經歷，大談自己抗病的崎嶇路。
「冇咗半條命」
過去多年，屢被傳患腦癌的李珊珊，雖然一直予之否認，不過昨晚珊珊終於在台上對自己病情首度開腔，更炮轟香港的醫療系統，她說：「𠵱家公立嘅醫療系統都係負荷到爆晒棚，大家都鼓譟鬧緊交，我嗰陣時，其實都冇咗半條命，我感覺到我好似喺個戰地裏面，總言之係兵荒馬亂。」珊珊又指即使願意花錢入私家醫院，也要面對沒有床位之苦，她說：「我去到私家醫院，醫生都係判斷我入醫院，但醫生非常之含蓄，又口窒窒咁話：『李小姐唔好意思，我哋𠵱家冇床位，不如𠵱家我幫你打針，你坐輪椅30分鐘，睇吓會唔會好啲，所以我好明白香港真係好需要醫療服務，或者係一啲緊急嘅援助，所以當主席邀請我嘅時候，我好希望即刻走出嚟，同大家分享呢個經歷。」
| | | |
隨後李珊珊又大談抗病的崎嶇路，病人最終只能靠自己，她說：「我呢幾年患病，得出嘅感受，就係要靠自己，亦唔需要人同情，亦唔需要人憐憫，因為呢條路係崎嶇，喺精神上或肉體上係痛苦嘅，雖然在座嘅人或者會問點解對病人咁苛刻呀，如果你自己係一個病人，無人可以幫到你走出呢條路。」
不過，李珊珊亦鼓勵病人要繼續堅強，更呼籲要善用時間，她說：「我衷心希望去講一樣嘢：善用時間，唔好埋怨，因為我喺住醫院其間過程，確實接觸到一啲不能解決病患嘅病人，我都幫唔到佢哋啲乜，不過見到佢堅強面對，去善用佢哋時間。上天畀個咁嘅經歷我，如果畀我選擇，我寧願係用最後努力去好好生存同用我嘅時間。」她表示會去盡最後努力好好去生存，她說：「因為當你係患病嘅時候你係冇得選擇，呢粒唔會係糖果嚟㗎，係唔會帶畀甜畀大家㗎。」
李珊珊在台上演說期間，表現得有點緊張，約八分鐘的演說也有點喘氣，說畢更未有接受訪問便坐着由大會安排的七人車離開伊館，到達深灣住所。落車時珊珊接受記者訪問顯得有點緊張，她表示一切復工事宜會以慈善優先。
傳患腦癌抑鬱
其實，珊珊自11年10月在上海出席慈善賽車活動後，一直未有再出席公開活動，有傳珊珊有腦瘤兼患上抑鬱症，要食藥、運動及戒酒抗病，儘管珊珊否認患腦癌，但過去幾年她健康的確出現問題，其中濕疹皮膚病令珊珊飽受困擾。直至16年6月她在微博宣佈當選港姐20周年，會義賣她約值138萬港元的港姐后冠連權杖及袍扣，成為城中熱話，可惜最後因未能獲得社會福利署批出公開籌款許可證，計劃無奈要煞停。至前年5月，有周刊指珊珊因拍賣后冠計劃用腦過度令腦瘤復發，發高燒休克入院；不過其後珊珊否認患腦瘤，只承認過去四個多月曾出入醫院，主要原因是「年紀大零件要維修。」
採訪：盧妹、黃曉程、梁繼光
攝影：林賓尼、仇志德
|
鍾意就快D Share啦！
|
|
|