林子祥繼2016年入行40周年演唱會後，相隔3年，於今年5月再踏紅館舞台開唱，相信到時必定又再掀起搶飛熱，甚至令黃牛問題繼續活躍，畢竟2017年左右，林子祥獲邀現身內地綜藝節目《我想和你唱2》，就算只表演少數幾首歌《男兒當自強》、《敢愛敢做》等，而且都係粵語歌，但一樣被內地觀眾熱烈追捧，其超闊音域以及極具衝擊力嘅演繹方式，更令現場觀眾high翻天，大讚薑係老嘅辣。可想而知，林子祥個唱門票勢必又係同胞必爭之地。不過喺官方開賣前，早已經出現未經授權嘅非官方售票網站，聲稱有渠道並接受預訂門票，情況認真猖獗。
黃牛問題嚴重，演唱會綵排又密鑼緊鼓，真係煩到林子祥頭都大晒，之但係吊頸都要抖氣，林子祥呢日就竄咗出嚟忙裡偷閒放鬆一下，一個人喺書局入面打書釘。已經71歲嘅佢唔單止仲係中氣十足好唱得，就連身體狀況睇落都好唔錯，只有少許花白頭髮，仍相當濃密，而且打書釘大半個鐘都係企定定好好腳骨力，再望望佢手臂，粗壯有老鼠仔㗎！睇怕每3年開一次個唱都唔成問題。
來源 source: http://nextplus.nextmedia.com
|
鍾意就快D Share啦！
|
|
|
