黎諾懿拍完兩套新劇《街坊財爺》以及《C9特工》之後，好快就要準備主持新飲食節目《暖男廚神》。一直都想追個豬女嘅佢，當然要把握呢段相對空閒時間努力造人啦，唔係就趕唔切豬年，隨時變老鼠女㗎喇。
為求追女成功，黎諾懿出盡法寶，話聽人講身體酸啲攰啲就會生女，所以佢嘗試搞殘自己，無論夜晚造人幾攰都好，第二朝都會一早湊仔消耗更多精力，甚至一家三口出動去海濱嘉年華放電。《壹》仔見到黎諾懿兩公婆推住BB車，由商場行去嘉年華，就嚟兩歲嘅小春雞坐喺BB車有啲呆萌，擺明係未瞓醒。不過入到嘉年華範圍受環境氣氛影響之下，小春雞開始有反應，腳仔跟住音樂節奏踢吓踢吓，見到有小朋友跑過仲眼甘甘、手指指咁笑出聲添，相當趣緻。
至於爸爸黎諾懿就梗係負責買飛入場啦，但佢藝人三寶（cap帽、黑超和口罩）全部無用，加上《愛•回家》、《BB來了》等角色形象深入民心，肯肯定逃唔過市民嘅輪番集郵啦，未入場已經開始影相，入場後更加好似打卡熱點咁，呢邊影完，轉個身嗰邊又再影。唔講笑，《壹》仔粗略估計有三十幾人搵佢合照。
黎諾懿話過小春雞係個好動小朋友，郁得多手腳協助發展得好，難怪人仔細細玩起攤位遊戲都似模似樣啦，甚至玩到唔願走，手指指示意想繼續玩，最後要爸爸半扯半抱帶走。放落地俾佢自己行，又會成個無尾飛陀咁走咗去，搞到黎諾懿成日好似趕鴨仔咁，你都咪話唔攰。啱㗎喇，個仔玩到攰夜晚有覺好瞓，阿爸阿媽就可以好酸咁追個豬妹。
來源 source: http://nextplus.nextmedia.com
|
鍾意就快D Share啦！
|
|
|