熊黛林（Lynn）在模特兒界拼搏20年，大前年終踏入人生另一階段，嫁個有錢人，去年還誕下一對可愛孖女，幸福就是Lynn的動力，現時，她視當母親為首要任務，兼顧工作，與時並進。
這位南京姑娘憑近180米身高當上天橋模特兒，06年毅然隻身來港發展，火速紅爆模界，她走過天橋、拍攝電影、演真人騷，多元發展，近年終於找到真愛，嫁予百億家族後人郭可頌，並誕下一對可愛孖女Kaylor與Lyvia，由名模搖身一變成為闊太，在港落地生根。
去年是Lynn的豐收年，當上媽媽，她直言感覺很不一樣，Lynn說：「2018年係我人生好大嘅豐收年，我生咗兩個女兩個咁得意，對於我嚟講，我嘅角色由一個女仔變成一個媽咪，我嘅任務更加重大，人生更加充實。以前唔使返工嗰陣時我會喺屋企扮吓靚，上吓網，同老公出去食吓飯，好舒服，而家變咗唔使做嘢嘅時候仲辛苦，由朝忙到晚，夜晚可能仲要起身照顧，好忙好充實！但係好開心、好幸福嘅！」
其實Lynn名副其實是廿四孝媽媽，談到湊女經她總是滔滔不絕，話題總離不開兩位寶貝女兒，幸福二字掛於臉上，Lynn照顧女兒事事親力親為，她說：「夜晚都有姨姨照顧，但係姨姨始終都要放假，都有需要我自己照顧嘅時候，工人姐姐我就一定唔會放心畀佢湊，唔係話佢唔專業，而係我過唔到自己嗰關，我會覺得咁細BB，自己照顧會放心啲，我個人係咁緊張嘅，所以夜晚一聽到喊就即刻彈起身，好凍嘅天氣，我會連拖鞋都唔着，褸都唔披一件，就即刻衝去隔籬，因為我起遲咗，另一個又會被嘈醒，咁就好大鑊。」
流感肆虐，Lynn也相當緊張，早前孖女不幸患上腸胃炎，Lynn極之心痛，她說：「而家會少啲去人多嘅地方，之前佢哋病咗，可能係去咗會所嘅兒童天地玩，好多小朋友一齊玩，佢哋摸完嘢又放入口，返嚟就病嘞，腸胃炎，又屙、又發燒，一個完咗就另外一個，跟住又傳番畀另一個，反反覆覆，夜晚肚痛，凌晨喺度喊，當時成家人醒晒，真係好肉赤，而家已經好番，呢輪唔敢去咁多小朋友嘅地方。」
能夠陪伴一對B女成長，Lynn認為這是一大樂事，她對女兒的期望很簡單，Lynn說：「佢哋日日都學識嘢，嘩！真係好開心呀！係我教㗎！我好想佢哋好開心咁樣成長，同埋喺冇乜壓力嘅情況下去學習、做嘢，我自己咁多年嚟做嘢係好大壓力、好辛苦！我唔想佢哋咁辛苦，開心啲，唔使佢哋大富大貴，只係想佢哋開心同健康，係好簡單嘅嘢。」
Lynn又不時請教姑奶郭可盈，她說：「一齊食飯嗰陣時成日會傾，見到佢都冇畀壓力津津（可盈囡囡暱稱），都會鼓勵佢做自己鍾意嘅嘢，去學習，我覺得咁先係最好。而我同老公諗法差唔多，唔使科科考第一，你合格就得！你開心就得！你鍾意學乜就學乜，唔鍾意嘅唔會迫你。」有考慮再生嗎？她說：「暫時唔會嘞！好辛苦！而家夠㗎嘞！而家會好享受，但嚟多個我唔得嘞！搞唔掂！」
Lynn是工作狂，在老公的支持下，她專心湊女之餘亦繼續兼顧工作，希望取得平衡，她說：「當然屋企會重要啲，不過始終要有自己事業。我一路都有工作，而家多咗拍廣告、影相，時間比較輕鬆啲，嚟緊我都會拍戲、出騷，遇到好鍾意劇本好多嘢都可以犧牲，咁老公可以帶兩個女嚟探我呢！老公都支持，唔做嘢會冇晒自信，我覺得好唔似我，最緊要係連同老公嘅共同話題都冇，咁就好易有問題發生，我辛苦命嚟，鍾意辛苦！」
Lynn跟老公前年開創運動服裝生意，問她未來會繼續有新挑戰？她說：「暫時做番媽咪呢個角色先，因為覺得仲未做得好好，仲係學習嘅階段嚟，慢慢嚟，我都鍾意喺社交網站寫低BB嘅趣事、影低佢哋啲相，同人分享吓，多嘅話唔排除可以出本書，紀錄吓佢哋成長經歷。都有人搵我哋拍嘢㗎，不過暫時太細個，未適應，等大個啲先。」
髮型：Chris @ilcolpo platinum
化妝：Ivan Lee
服裝及配飾：Max&Co、OceanX Watch
精選娛聞，喺晒《娛果》
http://fb.com/appledailyent
第二屆最港電影大獎投票網址
https://bit.ly/thekongestfilmawards2018
10萬蚊 100人分！
星期一至五晚上10點半
《動腦Q》Let's Q the money！
http://bit.ly/2QW8LcI
|
鍾意就快D Share啦！
|
|
|
