我唔係鼓勵你去賭錢，不過真係好想同你揭開麻雀館呢個神秘面紗。我走遍港九新界七間唔同麻雀館，同唔同負責人私底下索料佢哋點做生意。今日就同你分享下「十大麻雀館，點做生意？你要知」！
第十：香港麻雀館的歷史
麻雀館每月抽水過千萬，堅！但成本都高都你唔信，為咗留客，送送送，乜都送，成本至驚人。計錯數，分分鐘無錢賺。但記住，係麻雀館喎，唔係麻雀會！麻雀會只係普通「會所牌照」，無得抽水，個牌唔值錢。麻雀館就唔同啦，有錢都買唔到。要了解麻雀館，先同你講相關歷史先。
咁就一定要先提雞記，同佢始創人——「麻雀業鼻祖」林坤。佢1933年係廟街開咗間雞記士多賣零食，嗰時啲人無嘢做，就門口擺幾張枱畀啲街坊打麻雀，每人每日收一毫子。點知來嘅街坊越嚟越多，麻雀生意越嚟越好，索性士多都唔做，其他士多又效法，法例又無監管，變成越嚟越多嘅麻雀館從此誕生。
後來由於太盛行啦，1955年港英政府決定立法全面禁賭，頭號目標就係要取締全港成行成市嘅麻雀館，麻雀業瀕臨滅絕的危機。
人稱雞叔嘅林坤，就組織咗個「港九麻雀商會」，同政府講數，話打麻雀係中國國粹，亦都係平民百姓嘅消閒娛樂，有錢人可以去馬會，但窮人可以去邊度娛樂呢？
佢話香港人打麻雀就好似鬼佬打啤牌咁，如果要禁麻雀，不如禁埋啤牌。仲有喎，啤牌可以靜雞雞喺屋企打，但係麻雀噪音大，容易嘈到鄰居，所以喺麻雀館有規範下打好好多。經過佢四個月嘅游說，又畀佢講服咗港英政府，係1956年刊登憲報，宣佈麻雀業合法化。並以一副麻雀牌嘅總數144隻作上限，發出144個牌照。油麻地雞記亦都成為香港第一間持牌麻雀館。
嗰時港英政府為免鼓吹賭博，牌照上英文名稱都係用Mahjong School（麻雀學校），從此輸錢就畀人笑做交學費喇。
第九：麻雀館行業現況
麻雀館嘅現況?以前麻雀係用竹做，所以麻雀館又叫做竹館。麻雀館一向俾人認為係江湖人嘅生意——品流複雜、烏煙瘴氣、粗口橫飛、龍蛇混雜、打交爭地盤、刀光劍影、無法無天。動不動就拉去後巷拳打腳踢，無王管嘅九反之地。加上七八十年代，好多部警匪/英雄/江湖電影喺麻雀館內嘅暴力情節令大眾洗腦，如果你未入過麻雀館嘅話，呢啲係全部可能係個假像。
亦都係因為咁，2007年起業界就團結起嚟，全行通過唔準再將麻雀館外借拍江湖片，免得形象再受損。
但老實說，形象負面咗就好難改，令好多第二/三代都唔肯接手，加上顧客群老化，最衰嘅時候2003年沙士一役都令到好多麻雀館索性唔做。新牌又難攞，舊嘅執下執下，依家全港就只係淨返大約六十間持牌麻雀館。
沙士後鹹魚翻生，多謝(1)自由行，(2)新移民，(3)好多間麻雀館放棄廣東牌，引入深圳牌嘅碰槓牌玩法，俗稱全衝牌，即係「跑馬仔」以鬥快食糊為目標，只可碰，不可上，唔再嘥時間造牌/計番，食糊收錢外，開槓亦有錢收，同埋(4)自動麻雀機嘅盛行，縮短時間至每局三至五分鐘就搞掂，磅水。減少埋出千嘅機會。新玩法吸引咗唔少年青人同埋大陸客，依家可以說話從返麻雀業界嘅黃金歲月。
第八：黃金歲月？麻雀館如何出牌？
依家牌照係正式叫做「麻將/天九牌照」，係由民政事務總署發出。出牌條件包括：
.不得係中午12點至午夜12點以外時間營業
.未滿18歲嘅人唔入得
.唔可以向麻雀客人提供任何貸款或賒帳
.抽佣唔可以多過牌照列明嘅上限，依家一般都係5%
.持牌人必須親自經營管理，同埋唔可以轉讓個牌照，等等等等。
上面呢啲容易呀，下面3點先至哽。
(1)你需要證明申請人係合適經營麻雀館，(2)地區有確實需要多一間麻雀館(publicdemand)，同埋(3)充分考慮區內人士可能會提出嘅反對，即係佢講曬。我屋企樓下突然間開間麻雀館，我一定反對啦。
唔怪得知唔係行外人想申請麻將/天九牌照根本上係無可能。行內人搞，都起碼要搞一年至一年半。期間要納空租，所以麻雀館唔係自己物業都幾難搞。
仲有你留意下，中環/上環/西環/柴灣/小西灣/赤柱/將軍澳/九龍灣/青衣/東涌/沙田/上水等等講唔晒，都係無麻雀館。唔係無public demand呀，而係政府根本唔想你搞。
第七：麻雀館內設施
入門口，先見一見下關公先啦。記住營業期間要持續上香喎，免得失意頭導致輸錢。除咗傳統祭品外，最緊要放足夠生薑，點解?「夠薑」囉。我錄條片都可能算夠薑㗎啦。
茶水間，全場閉路電視，唔使講。防出千，防員工落格。牌例介紹，唔明就問人解釋到你明。牌種吊牌顯示每張枱嘅注碼打幾大，抽水後員工會拍一拍吊牌表示已經抽水。牆上面有水兜，兜住抽咗水嘅細額面鈔同埋散紙。水箱就要嚟裝住大額面鈔。
跑馬有分草地/泥地。打麻雀都有喎。舊式廣東牌用嘅係酸枝木檯面，因是啡色，故行內稱為「泥地」。新式嘅全衝牌（深圳牌）改用電動麻雀枱，一般係綠色絨布檯面，故行內稱為「草地」。由於流轉量同埋抽水快好多，依家，絕大部分都玩「草地」啦。
第六：麻雀館規則
唔好諗到咁複雜，比廣東牌簡單好多。Really，我係麻雀白痴，我去咗七間唔同嘅麻雀館打，一入去我就搵最細注碼嗰張枱，通常100/200，同另多三個人講到明我係初哥，打慢啲。佢哋都真係幾nice，教埋我打。唔齊腳？唔緊要，佢哋仲有「檯面」，即係穿著制服嘅「戥腳」方便幫人湊夠腳開枱。
我雖然前後交咗千零蚊學費，但我都有食糊㗎。連埋有幾間，一入去就畀封利是我，成舊水喎，對我呢啲「運吉」嘅算係咁㗎。
牌例？打法為大陸碰槓牌（即係跑馬仔），以鬥快糊牌為目標。唔駛造牌或計番數，只準碰牌（例如三隻三萬），唔準上牌（例如一二三萬）。開槓即收錢，（例如4隻三萬）。以100/200為例，自摸明槓每位收100，自摸暗槓每位收200，打畀人槓，一人輸300，如槓後自摸或再槓就三家畀錢。出沖，一人比錢200。自摸食糊每位收200，自摸之後再中獎馬，每位收多200。何謂中獎馬?即係話你食糊後，你有一次機會，按你位置要抽到以下嘅牌就可以double贏錢啦。所有牌例講唔曬，但基本上無乜技巧可言。行內人事形容為八成係運氣，兩成係技術。
你諗下，我咁渣，去足七間，都只係輸千幾蚊。去澳門肯定唔止。同澳門唔同，你係同賭場對賭。麻雀館就純粹抽水，邊個贏錢就抽水5%，可以話無風險。
第五：麻雀館員工點分工？
持牌人-即係最終負責任人，有咩鑊都係佢孭。
頭排-即係間舖嘅總管，企係間舖中間，一眼關七。
巡場-負責睇住自己範圍左右兩邊嘅麻雀枱
檯面-即係穿著制服嘅戥腳。麻雀館畀佢哋指引，一般都係「贏少少或者打平手」，避免大輸大贏，吸引客人繼續打落去。
圍場-即係唔使穿制服嘅戥腳，佢哋叫做「特約客戶commissioned player」呀。費事令客人有被三個制服人員包圍嘅感覺，好大壓力㗎！
後生-即係跑腿，幫人客買零食/交電費/買餸咁啦
茶水-即係斟茶遞水啦
水袋-即拿住個袋周圍走，負責幫人客唱錢同埋抽水
櫃面-負責現金收支
庶務-即係打雜
賬房-管數啦
以一間三十張枱麻雀館為例，員工都有成六十人。麻雀館嘅工，一般都認為係「筍工」。個個做十幾廿年唔願意走。點解？雖然返工12小時，好多都包括食飯同埋小息時間。人哋零售就返六日放一日，麻雀館就係返兩日放一日。
何謂資本主義？我依而家就show個最完美嘅典範俾你睇。麻雀館行規，賺錢？老闆分六成，員工分四成。我重複，老闆分六成，員工分四成。基本底薪以外，按職級分份數多少，頭排分兩至三份，後生分半份。以二線區嘅麻雀館為例，每月每份花紅約七千元至萬零蚊，如果旺區，旺角咁，一個普通女工月入都可能高達六至八萬。以前就日日埋單分紅，不過太煩啦，依家就每個星期分紅。係咪好過一般打工仔等到年尾先分紅呢。我點知？唔係我作呀！「鷄鳴報喜」呢本書有寫！
第四：麻雀館點賺錢？了解完行內嘅術語你就明啦。
銀頭-每日開舖時做生意嘅現金
水份-麻雀館每日抽水生意嘅收入，一般係抽贏家5%。
上數/下數:即係員工落場戥腳，贏錢就上數，輸錢就下數。行內人士同我講返，一般都係輸錢㗎，因為一家對三家，玩一陣，輸錢機會率梗係大啲啦，平均約十零廿個%啦。
睇下呢張「上下數」更紙。最頂嘅數字就係員工圍客編號，上半紅色字係「上數」，下半藍色字就係「下數」。
仲有:
大閘-就係每日固定支出，例如人工，租金，水電等
小閘-就係每日不固定嘅支出，例如人客嘅餐飲費，利是，日用品等
咁麻雀館點賺錢?好簡單，你就要睇「收實」啦。
收實-就係水份（即係嗰5%抽水）減去大閘、小閘（即係固定同埋雜項支出）、加或減上下數嘅贏輸、就即等如每日嘅盈利或者虧蝕啦。
但記住喎，老闆只係袋六成，四成畀返員工喎，咁先至上下一條心，真係良心企業。我都未做到！
第三：麻雀館最大成本係乜？
間舖通常得佢哋自己嘅，所以無舖租可言。員工人工？賺錢先分多啲畀佢啫。
要吸引新客，留住舊客，最大嘅成本梗係顧客服務啦。入得嚟打牌，舖內免費茶水/小食唔使講，想叫跑腿幫手買啲零食或者叫外賣，無問題?想食靚啲，魚翅/鮑魚/燕窩，都冇問題。交水費/電費/去街市買餸兼湊阿女放學呢？No problem，最緊要你留低打得開心。當然大家做生意，你打得細，就唔好姨姨哦哦啦。
大陸豪客，正呀！專車口岸接送，包飲、包食、包住、包shopping。聽講，個人客撞爛咗架車，佢都幫你整。聽落成本係咪好重呢。行內人士同我講返，呢啲貼身客戶服務嘅成本都佔咗水份嘅二至五成。你唔做咩？人哋做，你就冇咗個客。真係生意難做，呢個亦都係業界最擔心嘅成本失控。
第二：麻雀館如何防範老千？
呢啲情節，又過氣啦。雖然間中都有見到報道，話麻雀館有人出千。但近年真係唔多。點防範？
(1)麻雀館啲麻雀牌一般大隻啲，較難玩掩眼法。依家碰槓牌嘅新玩法——簡單、快，亦都難出千咗。
(2)一般你幾個朋友入去，就要分開枱坐，費事你幾個打龍通。四周圍都係閉路電視，加埋幾十對員工嘅眼望實邊個熟口熟面嘅老千出現，一見到你打牌嘅方法出現問題，就馬上請你走。話「外面有人搵你」，你就明㗎啦。
最後，第一，麻雀館賺幾錢呢？
而家香港最大嘅麻雀集團係瑞興麻雀，包括瑞昌、瑞豐、誠興麻雀館等。由前探長石鑑輝創立，個個都知道佢身家幾百億。代表麻雀館，肯定賺到錢。新玩法、新移民、新遊客、新設備，成為麻雀館近年嘅四大新動力，但政府依家又難發牌，我自己親身去好多間麻雀館，都要排隊先有牌打。往往旺足12小時。依家要同你計數。
以一間麻雀館有三十張枱為例，每鋪牌玩三至五分鐘，即係一個鐘頭就玩12鋪，三十張枱，12小時，全場全日就玩4320鋪。我知，未必由朝旺到晚爆晒，就打個七折，即係每日三千鋪。
注額平則街坊100/200，貴則旺區10000/20000，開槓馬上俾錢，自摸三家俾，中獎馬又double，就當每鋪平均係300/600，明槓每位300，再自摸食糊每家收600，合共2700，抽水5%即係135。
每鋪抽水135，乘以每日三千鋪，即係合共抽水差唔多四十萬。乘以30日，就每月抽水約千二萬啦。
唔怪得知，阿細雞林國強，喺佢本書嘅第104頁都有講，「依家係麻雀業嘅黃金歲月，據知收入最好的麻雀館，憑每鋪牌抽水百分之五，一日就有過一百萬元進帳。」扣埋人工、分紅，同埋顧客貼身服務同送出去優惠嘅成本，每月賺幾錢？你自己識計啦。
賺到錢後，係咁掃舖買物業，幾百億身家邊度來，你依家明啦。
最後，麻雀館真係唔係你想像中咁黑暗。大家都係打開門口做生意，有機會你幫襯過一次就明㗎啦。
撰文：李根興
立即下載Apps，隨時隨地睇盡時政專題、深度偵查、娛樂熱話！
按此連結： http://bit.ly/next28app
|
鍾意就快D Share啦！
|
|
|