有「中國第一美胸」之稱嘅內地女星徐冬冬於今年一月宣布「脫單」，承認同北上發展多年嘅香港男星尹子維拍拖半年，尹子維更發文認愛兼稱唔想外間胡亂猜測影響女友聲譽，之後二人不時被拍得甜蜜孖咇出動，早前冬冬更以「準新抱」姿態跟隨尹子維返美國老家見家長，融入家中共度新年。
正當大家以為佢哋可以走向人生另一階段時，有網民喺微博發文晒相話：「家樓下便利店撞見一個香港老演員，叫不出名字了，臉特別熟啊。跟一個女的吵架，把女方惹哭了，誰知道他叫啥啊，一時想不出來了。」唔少網民都認出相中人正是尹子維同徐冬冬，相中所見尹子維及徐冬冬正在街頭「對恃」，女方更坐喺街頭掩面痛哭，男方則一臉怒氣未有上前安慰，最終佢哋各散東西分頭走人！博文上載後即引起熱議，有網民加入戰團稱兩位主角嘅身邊朋友爆料，指尹子維同徐冬冬嘅助手過從甚密，疑似「出軌」，所以佢哋先至會當街吵大鑊！
來源 source: http://hk.on.cc
|
鍾意就快D Share啦！
|
|
|