黃秋生憑新晉導演陳小娟執導的電影《淪落人》，已先後擊落多個獎項，包括電影評論學會的最佳男演員、導演會影帝及本報的最港電影最佳男演員獎。在即將舉行的金像獎頒獎禮，成為一面倒影帝大熱門，聲勢一時無兩。
早前他在尖沙嘴為《淪》片宣傳，接受本報訪問時笑言大熱門會「輸死人」，他說：「輸死人呀，咁真係可能輸到傾家蕩產，唔好意思。我諗應該係買1蚊賠你2蚊咁啦，咁上下啦。發哥就1蚊賠1蚊，我差啲嘅。黑仔（姜皓文）嗰啲1蚊賠1,000，唔係睇佢唔起呀，不過真係輸死人吖嘛。城城，嘩！真係冇人提過佢咁滯喎。大佬，佢隨時1賠2,000（蚊），佢唔會（贏）啦，爆唔到咁冷呀，佢冷過黑仔。」不過講到自己老友、憑《逆流大叔》角逐爭獎的吳鎮宇，秋生比較客氣：「鎮宇都熱㗎，同我差唔多啦，都係1賠1。真係好難講，輸死人，隨時爆姜皓文。」他解釋因為金像獎評審多角度，不像電影評論學會大獎般，單角度由一班專業評審選出來，秋生說：「你會知佢從邊個角度出發，演技就係演技。唔似金像獎隨時係『幾好喎、進步喎』、『或者係今年畀呢個dramatic，收視高喎』，又或者『唔好意思吖，嗰個老前輩，唔畀唔係幾好嘅，好尷尬嘅』。可能有呢啲角度，所以多重角度，唔係一定用好唔好嚟評審。」
秋生自言就算有幸獲獎，都正為是否出席而煩惱，而且要講的感言隨着近日經常攞獎，已經到「無語」的境地，他笑說：「都講到冇嘢講，其實之前仲諗緊去唔去，廢事好似上一年咁尷尬，我又唔知（大陸）有冇直播。一陣我上台，人哋變晒白畫面、去廣告就無謂啦，影響人哋。搞到人哋今年又『冇咗』個最佳男演員，你講嘢下面又『O晒嘴』。」秋生以舞台劇術語形容這個現象為「演員的噩夢」，他笑說：「台上面講嘢以為下面有反應，但一片寂靜，石沉大海，寧靜到好似宇宙創生嘅時候咁樣，一片空無，你幾驚呀，好恐懼㗎嘛，上一年咪係咁囉。」好笑的是同一番說話出自不同人口中，結果是迥異，A講時全場一片空無，到B講時觀眾卻拍爛手掌兼雙眼發光，大嘆「真係講得好」，他說：「你睇完至發覺我係咪咁差呢，既然咁差就無謂參與，小器呀！你畀任何人都得，無謂尷尬，又未必係你嘅。」
話又說回來，秋生先後贏過兩座金像獎，他自言假如今年贏，將會別具意義。他回想當年憑《野獸刑警》贏第2座獎時的情況：「嗰時都未病完，係停咗藥，類固醇藥延續成年，好似暈吓暈吓咁，打緊生化戰。情況好似啲女人矇查查嫁人咁。《叉燒包》又係冇人睇得起嘅，都唔知點解，冇人覺得係我，成個狀態都好模糊，你睇個樣就知撞鬼啦。今次（《淪落人》）真係由地下彈到上天嘅，不停同自己講鎮定，唔好咁『巴之閉』，唔係單一你功勞。可能神賜畀你，又可能你好彩有朋友幫忙，所以我成日話唔係單係自己好叻。」秋生自言是演藝界「佛地魔」，不太敢提自己的名字：「唔提得，一提就震。」
最佳男主角入圍名單：
吳鎮宇《逆流大叔》
黃秋生《淪落人》
周潤發《無雙》
郭富城《無雙》
姜皓文《翠絲》
採訪：何永寧
攝影：林德雄、郭賢興
髮型：Taky @ fifthsalon
化妝：Jolinn
場地：House 1881
【編輯推介】
【ViuTV新搞作】被安排對撼無綫 秋官：如果冇信心又點會接
https://bit.ly/2G9MHIi
【太多泡狂NG】推自家品牌護膚品 阿Sa拍廣告成面泡變聖誕老人
https://bit.ly/2IvS4EP
【你有冇試過】袁文傑坐的士唔記得帶錢 感謝熱心司機
https://bit.ly/2USBaH3
【係咪飲得晒？】慶祝開始錄音 朋友幫周杰倫預備成枱珍奶
https://bit.ly/2Kp5KE8
【真係有投胎？】朋友行博物館見「熟口熟面」 阿Bob又同歷史人物撞樣
https://bit.ly/2GdFUi6
-----------------------------
動腦Q金像獎周
4月8日-12日 10:30PM
Let’s Q the money！Action！
https://hk.adai.ly/zpCd06PPwV
|
鍾意就快D Share啦！
|
|
|