大台人氣節目《#後生仔傾吓偈》早前有集討論「戀愛與性愛」，唔單只傾吓偈咁簡單，由年輕人性關係變得「隨便」咗嘅先性後愛模式當中，發現男女嘅性權力有微妙逆轉呢點，已經感覺到濃烈嘅認真mode。
講起「性」呢個話題，性博士馮盈盈真係七情上面特別肉緊，連拍檔陸浩明同麥明詩都話：「講起呢樣嘢，馮盈盈就真係嗶哩巴啦，突然間著咗！」事關FYY對於「拍拖期間應否有性生活」呢個話題表現得好激動，佢話：「性關係喺愛情中係好重要一部分，如果你完全唔去掂佢、唔了解，去到婚後有性生活，萬一真係唔夾咁點呀？離婚呀？唔夾都要繼續呀？有時有啲嘢係無得磨合㗎！」啱呀，比起有港姐包袱講埋啲「咩女仔要保護自己」云云，呢啲係比較「有血有肉」嘅內容。
感性派發表者有FYY，咁麥明詩當然係傾向理性學術一啲啦：「生物學角度嚟講係雙向，大家都想繁殖，但家長好多時會話女仔蝕底，要矜持啲，如果唔係就唔知個男仔同你拍拖係為咗咩嘢，所以要等到結婚，佢先至有動力埋單。我覺得調返轉嚟諗，如果一早已經有性生活，但佢都keep住同你一齊咪真愛囉，而唔係為咗達到『目的』先同你結婚。」
從呢班後生仔女嘅討論睇得出，性，唔再係「男仔著數，女仔吃虧」㗎喇，已經趨向「AA制」。甚至有啲情況係，女嘅好愛男朋友，但同時又會出去享受其他性生活，即性、愛分明。對此，麥明詩就話：「生理上某程度係邏輯合理嘅，心理上同肉體上嘅滿足，未必咁啱都可以嚟自同一個人，但最後唔work嘅重點通常係妒忌心問題，就算訂好晒規矩，講明各有各玩，但唔可以帶返屋企、唔可以過夜等等。諗呢，就好似幾理想，但好難實踐，因為人係好易嫉妒，『你搵件正過我，即係咩意思呀？』另外最大原因係男女生理周期，女性生完小朋友後吸引力可能下降，當大家都去到40歲，女性發現無乜market，男嘅反而繼續有market，到時就更加會妒忌同不安全感。」果然係10A。
來源 source: http://nextplus.nextmedia.com
|
鍾意就快D Share啦！
|
|
|