「宇宙最強，間中都會受傷」原來唔止係句歌詞，仲係句預言呀！話說「宇宙最強」甄子丹早排孖埋老婆汪詩詩，仲有亭亭玉立嘅囡囡甄濟如，出席慈善晚會。不過騷都未開始，子丹就怒氣沖沖拉隊走嘞，事後詩詩喺網上爆Seed，大爆「被一個海外機構歧視」，仲hashtag埋「中國人不是東亞病夫」添。雖然單嘢擾攘咗幾日，隨住主辦方發聲明補鑊，各界即刻冇晒Nuts食，但係當中仲有好多謎團未解，依然耐人尋味呀！
首先，子丹據講係以聯席主席身份去趁嘅，咁都被大會當路人甲，莫非呢個「聯席」嘅意思，其實就係廣東話所講嘅「搭枱」？再講吖，事後竟然有傳當日喺現場冇人知佢哋係星。喂，咪玩就算閣下對華語片有偏見，冇睇過子丹化身葉問，大打日本軍官、怒砌英國拳王、郁埋重量級拳王泰臣，子丹好歹都叫做喺《俠盜一號：星球大戰外傳》度棍毆白兵吖，你唔係搞錯咗人哋係尹光，咁離譜呀？
李小龍翻生都唔掂
不過最離奇嘅係詩詩個hashtag，事關上網搜尋「甄子丹+東亞病夫」，就會彈出子丹N年前喺台灣宣傳《精武風雲．陳真》，連踢多腳都踢唔爛「東亞病夫」塊牌匾。鬼咩，大會公關宣傳人員搵塊布嚟整牌匾，李小龍翻生都踢唔散啦。本來現代人出名善忘嘅，唔提都差啲唔記得㗎嘞， 點知詩詩一撩， 近排短片又喺Facebook洗版，唔少人都話成頭問號，問呢啲係咪叫「愛你變成害你」？
有鍵盤戰士就話嘞，子丹幾個月前喺無為意之下，幫咗個早年辱華嘅德國品牌喺米蘭行騷，結果被內地網民鬧爆，差啲千年道行一朝喪，好在及時發聲明割席，強調「無論何時、何地、何種形式，祖國堅決不容許侵犯」。家陣又遇上懷疑被種族歧視，有冇咁旺場呀？仲話子丹咁好打，被人Look down都冇即場「試吓入佢中路」，成件事好唔合理囉！
為妹出氣險捱亂刀
咁就真係有所不知喇，想當年子丹同細妹子菁喺台灣拍戲，點知阿妹被人恰，手臂瘀晒，子丹於是搵對方算帳，打到自己手指都彎埋至收手。事後對方大佬拖行友搵子丹報仇， 子丹話如果唔係電影公司老闆及時幫手出面化解，佢都唔知要捱幾多刀至收到科。呢件事令佢知道以暴易暴唔係辦法，法治社會應該以法律制裁壞人，咁先明智嘅。
講真，子丹十零歲就去咗波士頓生活，美國人「chink chink」聲咁嗌中國人，到家陣佢五十幾歲喇，種族歧視根本冇少到，長到成匹布咁款，再好打都踢唔爛「種族歧視」塊牌匾。話唔埋遲吓《葉問4》上映嗰陣，子丹又被人種族歧視，到時戲中嘅打美軍情節就真係食到應一應囉。
|
鍾意就快D Share啦！
|
|
|
