46歲的花姐說：「我91年入TVB做PA（助導）嘅！」身旁姜濤驚訝：「嘩，91年，我8年後先出世！」姜濤99年出世，花姐早已升做導演，為無綫音樂組的多個大騷擔幕後大旗了。
絕對生得出姜濤的花姐，因為真人騷《全民造星》，與姜濤這名字不時連在一起，但真正只得兩人排排坐做訪問的，這還是首次。兩人由去年5月節目海選開始，至今其實還不到一年，情感卻超越了監製與參賽者的身份。彼此關係似母子？姜濤承認：「我覺得佢真係好似我嘅第二個阿媽！」本身有兩個仔的花姐說：「有一樣嘢一定唔似嘅，係佢哋冇畀家用！」
要畀家用花姐，當然是講笑，實情是，已經到手的100萬獎金（《全民造星》冠軍獎金），姜濤全數都畀了真．阿媽，和花姐呢個「阿媽」，只有講心不講金。花姐說與其說兩人似母子，更貼近現實的說法是「同學仔」，大家都要從頭學習身份上的轉變。花姐由電視台監製變成經理人，要管理MIRROR十二子和ERROR四子；姜濤則由參賽者變成偶像藝人。
「母子」又好、「同學仔」又好，起碼，兩個人一條心。
撰文：文嘉龍
攝影：黃雲慶
【由一個仆街變到冇咁仆街】
關於身份的轉變，花姐說由《全民造星》一個真人騷發展到現在的情節，她一度覺得壓力好大，大得令她想逃跑。回到起點，原先只是一個「追夢」主題的節目而已，「最初我純粹係一個電視監製，我想做一個節目以追夢做主題，我從來冇諗過要幫呢班年輕人去追夢嘅，我只係打份工，做一個節目，直到99強去50強，見到有參賽者好畀心機比賽，我哋又用好殘酷嘅方法將呢啲唔得嘅參賽者趕走咗，我好深刻見到有啲參賽者喊住咁走，見到有個參賽者話：『我冇喇，我過咗今日、我聽日冇咗呢個夢喇！我要醒番！』」
就是這一句說話觸動了花姐的神經。「由嗰一刻開始我就覺得我唔止係做一個節目，一方面我係幫緊一班人；但一方面我又片碎緊一班人嘅夢想，我直頭覺得嗰時我自己係一個仆街！點解我要咁真實將呢啲咁殘酷嘅嘢畀人睇？就係為咗節目嘅效果。」由監製變經理人，花姐說：「𠵱家嘅我同最初《全民造星》係好唔同，𠵱家或者係我未來做緊嘅嘢，已經由我想做一個好媽媽、好老婆，變咗係做一個……如果講做一個經理人好似好核突咁，但我係好想幫到呢一班人囉！我都好希望MIRROR可以喺娛樂圈係俾人注意到，咁呢個就係我𠵱家同以前嘅分別喇！由一個仆街變到冇咁仆街囉！」
都說時間過得太快，比賽明明不到一年時間，姜濤出道更未夠半年。回帶兩人相遇的第一幕，姜濤回憶：「第一次見到花姐係casting嗰日，一入到去，我近視見唔到啲乜嘢，見到一個女人好嚴格咁問『你嚟做乜嘢呀？』」花姐的記憶是咁的：「我見到佢張相先，話係19歲又幾靚仔，大熱嚟嘅，咁梗係滿心期待睇吓佢係乜樣，之前見咗好多人唔係好靚仔，心情有啲頹，突然間見到有個小鮮肉行入嚟係幾醒一醒。」有靚仔睇自然醒神，但花姐話：「印象唔係咁好，又chok又扮嘢，佢casting做咗呢個咁嘅手勢（花姐現場示範韓國偶像的心心手勢），我反佢眼，印象麻麻哋。」
為參賽者誤會爆喊
轉捩點的交心位，劇情發展大綱是「最唔開心嗰時第一個想同邊個講？」花姐說：「有一次我喺《全民造星》度拍嘢，我同其中一位參賽者有啲誤會，我好唔開心，唔開心到喊呀……佢覺得我喺剪接上面會令到觀眾誤會咗佢哋，我點樣解釋都冇用，佢哋會覺得我係『做衰』佢嘅，我係偏心其他人嘅，我自己心裏面知道唔係吖嘛，但係我又解釋唔到，我就好唔開心咁行咗出去。我乜人都唔想見，但唔知點解我第一個諗起嘅人就係姜濤，我周圍問姜濤呢？姜濤呢？我最終都冇搵到佢講嘅，但我嗰刻就知道，姜濤喺我心入面，已經唔係參賽者同監製嘅關係咁簡單。」
【我好想好想同我老公去旅行】
花姐——行走江湖的名字，原名黃慧君的花姐，同姜濤一樣19歲入行。訪問期間有一剎那哽咽，就是講到自己身份的轉變。「我一行出屋企門口，就係諗咁樣對MIRROR好唔好呀？咁樣對ERROR好唔好呀？我𠵱家全部都係為緊人哋做嘢，我𠵱家覺得我冇咗自己呀，我𠵱家好似為緊人哋去做嘢。」
係咪向夢想進發？
花姐總為他人作嫁衣裳，「我都四十幾歲人，我又未退休，我都要為自己嘅將來行，呢條路對MIRROR啱啫、對花姐啱唔啱呢？譬如姜濤你想做歌手做藝人，都係向緊自己嘅夢想行，咁究竟我𠵱家係咪向緊我嘅夢想行呢？定係我只係返緊一份工，我份工只係要為佢哋好呢？（𠵱家夢想就係為佢哋好？）被迫係咁樣囉！」
91年入行由無綫《勁歌金曲》助導出身的花姐，經歷無綫、now到ViuTV，叫人追夢，自己都有夢。「譬如我好想好想同我老公去旅行，呢個係我嘅夢想；我好想搞個drama，呢個係我嘅夢想，我好想有人知道原來我拍drama係OK嘅，花姐嘅嘢係OK嘅，但係我𠵱家四十幾歲咯喎，可能我做嘢嘅時間唔會好長，仲有幾多年？但係我𠵱家做緊嘅嘢唔係我自己嘅夢想喎，我冇話要放棄佢哋（MIRROR／ERROR），但都會為自己嘅將來憂慮囉！」
花姐原先打算監製完《全民造星》後辭職，然後到老公的公司幫手，當然，事情的發展又是另一個故事了。說到犧牲和家人的相處時間，花姐又眼濕濕，「我老公唔係做呢行嘅，佢係做design，我嗰時話好想辭職去我老公公司嘅意思係，我可以分擔佢啲嘢……乘機我可以退休，幫佢計吓數咁！我兩個仔，一個17歲、一個13歲，我同老公講，佢哋都唔係好使我理，我哋可以去我哋想去嘅地方，因為我19歲就出嚟做嘢，花晒啲時間搵錢工作，真係冇乜機會去睇吓呢個世界，好想仲行得走得去睇吓呢個世界。我減肥都係因為呢個原因，我太肥驚行唔到、去唔到旅行。」
說花姐惡嗎？霸氣？大概是職場形象所需啫！說到底一個女人仔，「我老公好想去柬埔寨，我好想放低晒啲嘢同我老公去柬埔寨做乜都好！」想還想，事實是，《全民造星》第二季又開鑼在即，「放低晒啲嘢」怎麼可能？
【姜濤：梗係想去識多啲女仔】
相對花姐由監製變做經理人的心理掙扎，由素人變偶像的姜濤，19歲小鮮肉一鼓作氣，目標明確得多。「𠵱家嘅夢想，具體啲係想做一個全能嘅artist？因為我知道𠵱家嘅娛樂圈係一個好快會俾人淘汰嘅地方……我希望以後大家聽到姜濤個名，係覺得佢係乜都識嘅！我覺得呢個諗法係我鍾意嘅artist小豬（羅志祥），佢講過一句說話，就係你做乜就要似乜！」
人人都說毋忘初衷，姜濤的初衷比較簡單，18歲第一次參加《快樂男聲》，只為了不用付任何費用。「因為我比較孤寒、慳家，一直都係自己搵錢去學跳舞。睇到難得有比賽係唔使錢，個初賽仲要喺我屋企隔籬喎，咁我咪去囉，懵吓懵吓仲可以去埋大陸見埋自己嘅偶像小豬！」姜濤的英文名Show，亦即小豬羅志祥的英文名；Show Keung的偶像是台灣小豬和韓國Rain；不聽廣東歌，成長期吸收的都是國語歌韓國歌；四大天王是誰？總是數不出還有一個叫歌神的張學友……
姜濤說，由細到大屋企得佢一粒仔，生活乏味又單調，加上做飲食生意的父親，經常中港兩地走，平時他有甚麼都只會同媽媽傾訴。「我屋企背景好簡單，得我一個咋嘛，以前童年生活一直都係阿媽睇住我，阿爸就兩頭走。阿爸同阿媽嘅感情唔太close，又冇兄弟姊妹，得我一個，所以細個嘅生活都係好單調，唔會話阿爸阿媽帶你去好多地方呀，我阿媽身體又唔好，我阿媽40歲先生我，所以佢都係高齡產婦，身體好差。我由細到大已經幫手做家務，因為阿媽愛乾淨，細個返學又冇乜同學仔同我玩。」
做姜濤個ex會受傷
仍是處男之身的姜B，打算幾時先拍拖？「哈哈，呢個年紀尤其男仔，踏入青春期有邊個唔想拍拖呢？梗係想去識多啲女仔，但係我𠵱家做緊嘅嘢係代表緊支持自己嘅fans、代表緊公司，識一個女仔可能真係會害到個女仔，佢真係會俾人起底，萬一分咗手，佢可能會俾人冠以姜濤個ex，咁對女仔可能係一個傷害，如無必要唔好帶畀個女仔咁大困擾。」他說：「我會好小心同佢哋相處。」花姐問：「𠵱家好多女仔埋你身咩？」姜濤又問番花姐：「咁點樣為之想識我？」姜濤最後說：「唔會特別去諗呢一件事，唔會特別去抗拒呢件事，呢一刻更加多慾望，（咩慾望？）工作嘅慾望啫，哈哈！」
【後記】坐喺度屙尿嘅技安
花姐話：「有好多人唔知嘅係，佢（姜濤）參加《全民造星》純粹係想識朋友，咁當然都係想入行啦，但識朋友係重點，因為佢由細到大都冇朋友。」
姜濤就說自己在學校為了引人注意，上堂成日「玩Miss」。「我細個好曳㗎！成績一定係唔得啦，一定係有幾日唔返學啦，上親堂都熄Miss盞燈，即使Miss喺隔籬都照熄呀，副校長教緊書我都唔理佢照熄燈。其他同學好開心，我其實唔受同學歡迎嘅，我唔知點解做呢啲嘢出嚟啲同學都會好開心，我就用呢啲方法去引人注意！」花姐聽完即刻話：「你好幼稚！」中學年代是個200磅肥仔的姜濤，花姐說：「我冇諗過技安會變咗姜濤！」姜濤答她：「技安都鍾意唱歌！」
問姜濤有甚麼秘密未向花姐透露過？他爆出一句：「我去廁所係坐喺度屙尿嘅，哈哈哈……因為媽媽教得好，佢話男仔企喺度屙尿會污糟。」花姐話：「冇人想知呢個秘密呀！黐線！」
花姐再爆料，話說訪問前一晚，MIRROR十二子為演藝人協會晚宴表演，姜濤在台下竟然一個人鯨吞了五碟甜品。曾經200磅，下星期才踏入20歲的姜濤，現在仍是一字頭的世界，有得食，最開心，正如粉絲外號也叫「姜糖」，都係食嘅！
|
鍾意就快D Share啦！
|
|
|